Túrkistanda tennisten 12 jasqa deiingi balalar arasynda «Turkestan Open 12 & under» respýblikalyq ashyq týrniriniń ashylý saltanaty ótti. Birinshi dárejeli respýblikalyq ashyq týrnirge Astana, Almaty, Atyraý, Aqtóbe, Shymkent, Taldyqorǵan, Taraz, Kókshetaý, Túrkistan qalalary men óńirlerinen 64 sportshy (32 uldar, 32 qyzdar) qatysýda. Olar bes kún boiy ózara báskege túsedi, dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Biyl tórtinshi márte uiymdastyrylǵan týrnir tennis sportyn damytý, jas sportshylarǵa qoldaý kórsetý maqsatynda ótip otyr.
Ashylý saltanatyna Túrkistan oblysynyń dene shynyqtyrý jáne sport basqarmasy basshysynyń orynbasary Jazira Mýsimova qatysyp, sportshylarǵa sáttilik tiledi.
– Kieli Túrkistan tórinde bastalǵaly turǵan «Turkestan Open 12 & under» respýblikalyq ashyq týrnirine qosh keldińizder. Ózderińizge málim, elimizdiń Prezidenti Qasym-Jomart Toqaev óz Joldaýynda «Buqaralyq sportqa, dene tárbiesine jáne balalarǵa basymdyq berý kerek. Ár oblysta, iri aýdan ortalyqtarynda sport úiirmelerin ashý qajet», degen bolatyn. Osy baǵytta Túrkistan oblysynyń sport salasynda aitýly ister atqarylyp jatyr. Búgingi jarysta barshańyzǵa sáttilik tileimin. Tek myqtylar ǵana jeńiske jetsin, – dedi Jazira Rústemqyzy.
Respýblikalyq tennis týrniriniń ashylý saltanatynda tennistiń damýyna eleýli úles qosqany úshin Shymkent qalasynyń jetekshi jattyqtyrýshysy Sergei Ignatovqa uiymdastyrýshylar tarapynan syi-siiapat tabys etildi.
Jalpy atalǵan jarys jeke jáne juptyq synda uiymdastyrylýda. Saiys sońynda jeńimpazdar men júldegerlerge diplom, medaldar tabystalady.
Aita keteiik, jalpy búgingi tańda «Tennis ortalyǵynda» 300-ge jýyq shákirt sporttyń úsh túrimen kásibi turǵyda shuǵyldanýda. Munda ústel tennisi, úlken tennis jáne badmiton sport túrleri damytylady.
