Túrkistan oblysy ákiminiń orynbasary Beisenbai Tájibaevtyń tóraǵalyǵymen ótken májiliste týristik nysandar men kieli oryndarǵa tazalyq jumystaryn júrgizý máselesi qaraldy, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
– Memleket basshysynyń bastamasymen elimizde «Taza Qazaqstan» respýblikalyq ekologiialyq aktsiiasy ótip jatyr. Ótken aptada «Taza ólke» aptalyǵy uiymdastyrylsa, endi «Kieli meken» aptalyǵy bastalyp otyr. Osy naýqan aiasynda tarihi-mádeni oryndarda tazalyq jumystaryn júrgizý qajet.
Zań talaptaryna sáikes, oblystaǵy sanitarlyq-gigienalyq oryndardyń qyzmetine turaqty túrde baqylaý júrgizip, sanitarlyq talapqa sáikes kelmeitin oryndardy retteý úshin aldyn ala sharalar qabyldańyzdar. Eń aldymen týristik nysandardaǵy jáne olarǵa baratyn jol boiynda syn kótermeitin sanitarlyq-gigienalyq toraptardy joiý máselesi tur.
Jii túsindirme jumystaryn júrgizińizder. Qyzmet kórsetetin jerlerdi anyqtap, zamanaýi talapqa sáikes keletin jyljymaly dúńgirshekterdi ornatý jumystaryn uiymdastyrýymyz kerek. Bul bir jaǵy shaǵyn jáne orta biznesti damytýǵa sep bolady. Erekshe qorǵalatyn tabiǵi aýmaqtardyń týristik maýsymǵa daiyndyǵy da asa mańyzdy, – degen oblys ákiminiń orynbasary áleýmettik nysandarda da tazalyq jumystaryn júrgizýdi tapsyryp, jaýapty basqarmalarǵa mindettemeler júktedi.
Jiyn barysynda Túrkistan oblystyq Mádeniet jáne týrizm basqarmasy basshysynyń orynbasary Nurdáýlet Medeýov oblystaǵy týristik nysandardyń sanitarlyq jai-kúii jáne ekotýrizmniń damýy boiynsha baiandama jasady.
Onyń aitýynsha jalpy 2023 jyly týrister aǵynynyń ósýi baiqalǵan. Jyl qorytyndysymen Túrkistan oblysyna kelgen týrister sany 562,8 myń adamdy qurasa, óńirge 1 millionǵa jýyq birkúndik kelýshi kelgen. Oblys boiynsha respýblikalyq mańyzy bar avtombil joldary boiynda jer telimderinde 115 jol servis nysany jáne demalys alańdaryndaǵy 8 sanitarlyq gigienalyq torap ornalasqan.
Sondai-aq, jeke investorlar tarapynan taǵy 5 torap salý josparlanýda. 24 demalys alańy bar, olardyń qarqyndylyǵy táýligine 3700-den astam avtokólikti quraidy.
Bul toraptardy kommertsiialyq mekemelerge senimgerlik basqarýǵa bere otyryp kútip ustaý máselesin sheshýge bolady. Búginde kásipkerlik sýbektilerinen 3 ótinim túsip, oń sheshim qabyldanǵan. Jalpy 88 torap bolǵanymen, týristik nysandar aýmaǵynda 39 sanitarlyq-gigienalyq torap ornatý qajettiligi bar.
Aita keteiik, «Taza Qazaqstan» ekologiialyq aktsiiasy aiasynda ár aptada tabiǵatty aialaý baǵytynda is-sharalar uiymdastyrylmaq. Bul bastamaǵa aýdan, qala ákimdikteri de atsalysyp, óńirdegi týristik nysandarǵa tazalyq jumystaryn júrgizý josparlanýda.
