Kesene qurylysy aıaqtalǵan soń «jamaǵathana» bólmesindegi alyp Taıqazanǵa sý toltyrylyp, zıaratshylarǵa arnaıy tarqatylyp otyrǵan. Qudyq HİH ǵasyrdyń bastapqy shıregine deıin jumys jasaǵan. 1992-1999 jyldar aralyǵynda Túrkıanyń «Vakf Inshaat» fırmasy kesenege júrgizilgen restavrasıalyq jumystarǵa baılanysty qudyq sýy múlde jabylǵan bolatyn.
– 2018 jyldyń qazan aıynda Memleket Basshysy N.Á.Nazarbaevtyń Túrkistan qalasyna resmı sapary barysynda Qoja Ahmet Iasaýı kesenesine arnaıy at basyn buryp, ortaǵasyrlyq qudyqty halyq ıgiligine jaratyp, iske qosý týraly tapsyrma bergen-di. Osyǵan oraı, qudyq sýy tazartý jumystary júrgizilip, sýdyń quramy barlyq tıisti saraptamalardan ótip tıisti qujattar daıyndaldy. Búgin 16 – jeltoqsan Qazaqstan Respýblıkasynyń Táýelsizdik kúnine oraı atalmysh qudyq qaıta iske qosylyp halyqtyń ıgiligine jaratylatyn bolady, – dedi qoryq-mýzeı dırektory Nurbolat Ahmetjanov.
Endi zıaratqa kelýshiler tarıhı qudyqtan shólin qandyratyn bolady.
Qudyqhana – qazandyq pen dáliz arqyly baılanysty ǵımarattyń shyǵys jaǵyndaǵy,munaraǵa kóteriletin baspaldaǵy bar sharshy bólme ońtústiktegi shuǵyl oıyq esebinen sozylyńqylaý bolyp kórinedi. Qudyqhananyń aty osyndaǵy qudyqpen baılanysty. Tarıhı derekkózderde qurylys kezinde sý alý úshin qazylǵan, keıinnen din ıeleri qudyqtan tartylǵan sýdy da shıpaly dep jarıalaǵan dep aıtylady. Qudyq aınalasy dóńgelene kirpishten qalanǵan, dıametri-80 sm. Buryn sý 7-8 metr tereńdikten shyǵatyn bolsa, al qazir jer asty sýlarynyń kóterilýine baılanysty sý 5-6 metr tereńdikten alynady.
«Áziret Sultan» memlekettik tarıhı-mádenı qoryq-mýzeıiniń baspasóz qyzmeti
