كەسەنە قۇرىلىسى اياقتالعان سوڭ «جاماعاتحانا» بولمەسىندەگى الىپ تايقازانعا سۋ تولتىرىلىپ، زياراتشىلارعا ارنايى تارقاتىلىپ وتىرعان. قۇدىق ءحىح عاسىردىڭ باستاپقى شيرەگىنە دەيىن جۇمىس جاساعان. 1992-1999 جىلدار ارالىعىندا تۇركيانىڭ «ۆاكف ينشاات» فيرماسى كەسەنەگە جۇرگىزىلگەن رەستاۆراسيالىق جۇمىستارعا بايلانىستى قۇدىق سۋى مۇلدە جابىلعان بولاتىن.
– 2018 جىلدىڭ قازان ايىندا مەملەكەت باسشىسى ن.ءا.نازاربايەۆتىڭ تۇركىستان قالاسىنا رەسمي ساپارى بارىسىندا قوجا احمەت ياساۋي كەسەنەسىنە ارنايى ات باسىن بۇرىپ، ورتاعاسىرلىق قۇدىقتى حالىق يگىلىگىنە جاراتىپ، ىسكە قوسۋ تۋرالى تاپسىرما بەرگەن-دى. وسىعان وراي، قۇدىق سۋى تازارتۋ جۇمىستارى جۇرگىزىلىپ، سۋدىڭ قۇرامى بارلىق ءتيىستى ساراپتامالاردان ءوتىپ ءتيىستى قۇجاتتار دايىندالدى. بۇگىن 16 – جەلتوقسان قازاقستان رەسپۋبليكاسىنىڭ تاۋەلسىزدىك كۇنىنە وراي اتالمىش قۇدىق قايتا ىسكە قوسىلىپ حالىقتىڭ يگىلىگىنە جاراتىلاتىن بولادى، – دەدى قورىق-مۋزەي ديرەكتورى نۇربولات احمەتجانوۆ.
ەندى زياراتقا كەلۋشىلەر تاريحي قۇدىقتان ءشولىن قاندىراتىن بولادى.
قۇدىقحانا – قازاندىق پەن ءدالىز ارقىلى بايلانىستى عيماراتتىڭ شىعىس جاعىنداعى،مۇناراعا كوتەرىلەتىن باسپالداعى بار شارشى بولمە وڭتۇستىكتەگى شۇعىل ويىق ەسەبىنەن سوزىلىڭقىلاۋ بولىپ كورىنەدى. قۇدىقحانانىڭ اتى وسىنداعى قۇدىقپەن بايلانىستى. تاريحي دەرەككوزدەردە قۇرىلىس كەزىندە سۋ الۋ ءۇشىن قازىلعان، كەيىننەن ءدىن يەلەرى قۇدىقتان تارتىلعان سۋدى دا شيپالى دەپ جاريالاعان دەپ ايتىلادى. قۇدىق اينالاسى دوڭگەلەنە كىرپىشتەن قالانعان، ديامەترى-80 سم. بۇرىن سۋ 7-8 مەتر تەرەڭدىكتەن شىعاتىن بولسا، ال ءقازىر جەر استى سۋلارىنىڭ كوتەرىلۋىنە بايلانىستى سۋ 5-6 مەتر تەرەڭدىكتەن الىنادى.
«ازىرەت سۇلتان» مەملەكەتتىك تاريحي-مادەني قورىق-مۋزەيىنىڭ باسپا ءسوز قىزمەتى
