Memleket basshysy Qasym-Jomart Toqaev metalýrgterdi marapattaý týraly Jarlyqqa qol qoıyp, qoǵamdy eńbek adamdaryn qurmetteýge shaqyrǵan bolatyn.
Osyǵan oraı, búgin Metalýrg kúni qarsańynda otandyq metalýrgıa salasyndaǵy jemisti eńbegi, elimizdiń ónerkásiptik jáne ınfraqurylymdyq damýyna qosqan úlesi úshin júzdegen jumysshy memlekettik nagradalarmen marapattaldy.
Túrkistan oblysynda da eńbek adamyna qurmet kórsetildi. Oblys ákimi Darhan Satybaldy tájirıbeli metalýrg, Túrkistan óńiriniń damýyna úles qosqan maman Nurlan Qadyrálıevke «Qurmet» ordenin tapsyrdy. 1965 jyly týǵan azamat Shymkent mehanıkalyq zaýytynda slesar ári bolat balqytýshy bolǵan.
Qazir «KARLSKRONA LC AB» kompanıasynda bas bolat balqytýshy bolyp jumys istep júr. Jalpy eńbek ótili 40 jylǵa jýyqtaǵan.
Oblys ákimi marapat ıesine Prezıdentimizdiń eńbek adamdaryna qurmet kórsetýdegi bastamalary týraly aıta kele, Túrkistan obolysyn damytýda metalýrgterdiń de úlesi bar ekenin jetkizdi.
Aıta keteıik, Memleket basshysynyń Jarlyǵymen metalýrgıa salasynda isteıtin 22 jumysshy «Qurmet» ordeniniń kavaleri atandy, 41 ónerkásip qyzmetkeri İİİ dárejeli «Eńbek dańqy» ordeniniń, 51 adam «Eren eńbegi úshin» medaliniń ıegeri boldy. Sonymen qatar 7 maman Qazaqstan Respýblıkasy Prezıdentiniń Qurmet gramotasyn ıelendi.
