Qazaqstan Respýblikasynyń Premer-ministri Oljas Bektenov Qytaidyń Xinjiang Lihua (Group) Co., Ltd kompaniiasy direktorlar keńesiniń tóraǵasy Chjan Tsihaimen kezdesti. Túrkistan oblysyndaǵy TURAN arnaiy ekonomikalyq aimaǵynda maqta-toqyma klasterin qurý jónindegi investitsiialyq jobany iske asyrý barysy qaraldy, dep habarlaidy Dalanews.kz.
Joba maqta ósirýden bastap iirilgen jip, mata, kiim túrindegi basqa da daiyn toqyma ónimderin shyǵarýǵa deiin óndiristiń tolyq tsiklin, iaǵni, maqta agroónerkásibi keshenin qalyptastyrýǵa baǵyttalǵan. Egis alqaptaryna 50 myń gektardan astam jer bólindi, 10 zaýyt salý josparlanyp otyr, onyń ishinde 4-ýi egis alqaptaryna jaqyn maqta óńdeý boiynsha, 2-ýi – zamanaýi sý únemdeý tehnologiialaryn qoldana otyryp, tamshylatyp sýarý júielerin óndirý boiynsha, sondai-aq tigin jáne boiaý-árleý fabrikasyn qosa alǵanda, 4 toqyma zaýyty bar. Investitsiialardyń jalpy somasy 200 mlrd teńgeden asady. 4 myńnan astam jumys ornyn, onyń ishinde 3 myń turaqty jumys ornyn ashý kózdelgen.
Búginde klasterdiń qajettilikterin qamtamasyz etý úshin PVH qubyrlaryn shyǵaratyn zaýyt iske qosyldy, toqyma fabrikalarynyń qurylysy bastaldy. Investor sýarý infraqurylymynyń (kanaldar jelisi, sorǵy stansasy) qurylysyn júrgizýde.
Premer-ministr Oljas Bektenov iske asyrylyp jatqan jobanyń mánin jáne ekonomikany damytýdaǵy klasterlik tásildiń mańyzdylyǵyn atap ótti. Túrkistan oblysy – Qazaqstannyń maqta ósiretin jalǵyz óńiri.
«Memleket basshysy ekonomikany ártaraptandyrý jáne naqty sektorǵa investitsiia tartý mindetin qoidy. Maqta-toqyma klasterin qurý ónimniń qosylǵan qunyn arttyrýǵa, qaita óńdeýge jáne elimizdiń eksporttyq áleýetin arttyrýǵa basa nazar aýdara otyryp, aýyl sharýashylyǵy óndirisin damytýǵa yqpal etedi. Úkimet óz tarapynan qajetti qoldaý kórsetedi», — dedi Oljas Bektenov.
Aita ketsek, Xinjiang Lihua (Group) Co., Ltd – Qytaidyń maqta ónerkásibindegi eń iri kompaniialardyń biri. Shyńjań kompaniiasy qytailyq 500 iri aýylsharýashylyq kásiporyndarynyń reitinginde 55-shi orynda tur. Kompaniia tuqym ósirýden bastap, toqyma ónimderin shyǵarýǵa deiingi maqtany keshendi óńdeýge jáne tolyq óndiristik tsikldy basqarýǵa mamandanǵan.
