قازاقستان رەسپۋبليكاسىنىڭ پرەمەر-مينيسترى ولجاس بەكتەنوۆ قىتايدىڭ Xinjiang Lihua (Group) Co.، Ltd كومپانياسى ديرەكتورلار كەڭەسىنىڭ ءتوراعاسى چجان سيحايمەن كەزدەستى. تۇركىستان وبلىسىنداعى TURAN ارنايى ەكونوميكالىق ايماعىندا ماقتا-توقىما كلاستەرىن قۇرۋ جونىندەگى ينۆەستيسيالىق جوبانى ىسكە اسىرۋ بارىسى قارالدى، دەپ حابارلايدى Dalanews.kz.
جوبا ماقتا وسىرۋدەن باستاپ يىرىلگەن ءجىپ، ماتا، كيىم تۇرىندەگى باسقا دا دايىن توقىما ونىمدەرىن شىعارۋعا دەيىن ءوندىرىستىڭ تولىق سيكلىن، ياعني، ماقتا اگروونەركاسىبى كەشەنىن قالىپتاستىرۋعا باعىتتالعان. ەگىس القاپتارىنا 50 مىڭ گەكتاردان استام جەر ءبولىندى، 10 زاۋىت سالۋ جوسپارلانىپ وتىر، ونىڭ ىشىندە 4ء-ۋى ەگىس القاپتارىنا جاقىن ماقتا وڭدەۋ بويىنشا، 2ء-ۋى – زاماناۋي سۋ ۇنەمدەۋ تەحنولوگيالارىن قولدانا وتىرىپ، تامشىلاتىپ سۋارۋ جۇيەلەرىن ءوندىرۋ بويىنشا، سونداي-اق تىگىن جانە بوياۋ-ارلەۋ فابريكاسىن قوسا العاندا، 4 توقىما زاۋىتى بار. ينۆەستيسيالاردىڭ جالپى سوماسى 200 ملرد تەڭگەدەن اسادى. 4 مىڭنان استام جۇمىس ورنىن، ونىڭ ىشىندە 3 مىڭ تۇراقتى جۇمىس ورنىن اشۋ كوزدەلگەن.
بۇگىندە كلاستەردىڭ قاجەتتىلىكتەرىن قامتاماسىز ەتۋ ءۇشىن پۆح قۇبىرلارىن شىعاراتىن زاۋىت ىسكە قوسىلدى، توقىما فابريكالارىنىڭ قۇرىلىسى باستالدى. ينۆەستور سۋارۋ ينفراقۇرىلىمىنىڭ (كانالدار جەلىسى، سورعى ستانساسى) قۇرىلىسىن جۇرگىزۋدە.
Xinjiang Lihua (Group) Co.، Ltd كومپانياسى ديرەكتورلار كەڭەسىنىڭ ءتوراعاسى چجان سيحاي ەلىمىزدەگى قولايلى ينۆەستيسيالىق احۋالدى جانە جوبا ءۇشىن ءوڭىردىڭ ءتيىمدى كليماتتىق ەرەكشەلىكتەرىن اتاپ ءوتتى. چجان سيحاي بيىلعى قازان ايىنان باستاپ دايىن ءونىمنىڭ العاشقى ءوندىرىسىن ىسكە قوسۋ جوسپارلانىپ وتىرعانىن حابارلادى.
پرەمەر-مينيستر ولجاس بەكتەنوۆ ىسكە اسىرىلىپ جاتقان جوبانىڭ ءمانىن جانە ەكونوميكانى دامىتۋداعى كلاستەرلىك ءتاسىلدىڭ ماڭىزدىلىعىن اتاپ ءوتتى. تۇركىستان وبلىسى – قازاقستاننىڭ ماقتا وسىرەتىن جالعىز ءوڭىرى.
«مەملەكەت باسشىسى ەكونوميكانى ءارتاراپتاندىرۋ جانە ناقتى سەكتورعا ينۆەستيسيا تارتۋ مىندەتىن قويدى. ماقتا-توقىما كلاستەرىن قۇرۋ ءونىمنىڭ قوسىلعان قۇنىن ارتتىرۋعا، قايتا وڭدەۋگە جانە ەلىمىزدىڭ ەكسپورتتىق الەۋەتىن ارتتىرۋعا باسا نازار اۋدارا وتىرىپ، اۋىل شارۋاشىلىعى ءوندىرىسىن دامىتۋعا ىقپال ەتەدى. ۇكىمەت ءوز تاراپىنان قاجەتتى قولداۋ كورسەتەدى»، — دەدى ولجاس بەكتەنوۆ.
ايتا كەتسەك، Xinjiang Lihua (Group) Co.، Ltd – قىتايدىڭ ماقتا ونەركاسىبىندەگى ەڭ ءىرى كومپانيالاردىڭ ءبىرى. شىڭجاڭ كومپانياسى قىتايلىق 500 ءىرى اۋىلشارۋاشىلىق كاسىپورىندارىنىڭ رەيتينگىندە 55ء-شى ورىندا تۇر. كومپانيا تۇقىم وسىرۋدەن باستاپ، توقىما ونىمدەرىن شىعارۋعا دەيىنگى ماقتانى كەشەندى وڭدەۋگە جانە تولىق وندىرىستىك سيكلدى باسقارۋعا ماماندانعان.
