«Túrkistan – Qoja Ahmet Iassaýi» meshitinde Túrkistanda máńgi qonys tapqan qazaq handary men bileriniń rýhyna Quran baǵyshtalyp, aýyzashar berildi. Rýhani keshte oblys ákimi Darhan Satybaldy barsha qaýymdy qasietti Ramazan aiymen quttyqtady, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
– Ramazan – on eki aidyń sultany, berekeli de keshirimi mol ai. Kúlli musylman qaýymy, ata-babalarymyz bul aidy asyǵa kútip, qulshylyqtaryn kúsheitken. Eldiń amandyǵy, birligi úshin duǵa etip, Alladan tilek tilegen.
Qazir elimizdiń birneshe óńirinde sý tasqynyna qarsy jumystar atqarylyp jatyr. Sondaǵy baýyrlarymyz, otandastarymyz úshin de tilek tileiik. Qiyndyqtar artta qalsyn!
Búgingi kezdesýdi paidalana otyryp, jomart, janashyr azamattardy, kásipkerlerdi kómekke muqtaj adamdarǵa qamqorlyq kórsetýge, tabiǵi apat saldarynan japa shekken alystaǵy aǵaiyn-baýyrǵa qol ushyn berip, kómektesýge shaqyramyn.
Qutty, qasietti aidyń sońǵy kúnderinde tilegen duǵa-tilekterińiz qabyl bolsyn! Qazaq úshin Túrkistannyń orny airyqsha. Memleket basshylyǵy tarapynan qasietti aimaqqa kóńil bólinip jatyr. Biz Túrkistandy damytý jumystaryn jalǵastyramyz. Táýelsizdigimiz baiandy, elimiz aman, jurtymyz tynysh bolǵai! – dedi oblys basshysy.
Kesh Túrkistan oblysynyń bas imamy Erjan Tólepovtyń aýyzashar batasymen bastaldy. Jiyndy dástúrli ánshi Bekzat Sákenuly júrgizdi. Kesh barysynda ardagerler, abyz qariialar, ziialy qaýym ókilderi taǵylymdy áńgime, ónegeli ósiet týraly oi órbitti. Qazaqstan musylmandary dini basqarmasy Sairam aýdanynyń bas imamy Arystan Ospanov ýaǵyz aitsa, Ámire qajy Bekaidar bata berdi. Qoja Ahmet Iasaýidiń, qazaq handarynyń rýhyna quran baǵyshtaldy.
Rýhani keshke qatysqan jamaǵat bir-birine «Orazadan orazaǵa aman-esen jete bereiik» dep tarqasty.
Túrkistan topyraǵynda 40-tan astam dini-rýhani tulǵa, qazaqtyń 21 hany, 8 sultan, 20-dan astam bi, 60-tan astam batyr, áziz analar, igi jaqsylar jatyr. Atalǵan ańyz adamnyń barlyǵy da qazaq tarihy men rýhaniiatynda erekshe mánge ie.
