Túrkistan oblysynyń ákimi Nuralhan Kósherovtiń tóraǵalyǵymen ótken keńeste Memleket basshysy Qasym-Jomart Toqaevtyń «Jasandy intellekt dáýirindegi Qazaqstan: ózekti máseleler jáne ony túbegeili tsifrlyq ózgerister arqyly sheshý» atty Qazaqstan halqyna Joldaýyn júzege asyrý sharalary qaraldy. Jiynǵa oblys ákiminiń orynbasarlary, aýdan-qala ákimderi, oblystyq basqarma basshylary, quqyq qorǵaý organdary men qoǵam ókilderi qatysty,- dep habarlaidy Dalanews.kz.
Aimaq basshysy Prezident Joldaýynda qoiylǵan mindetterdi ýaqytyly ári sapaly oryndaýǵa erekshe mán berip, olardy júzege asyrý boiynsha orynbasarlary men jaýapty basshylarǵa naqty tapsyrmalar berdi. Túrkistan oblysynda Joldaýdan týyndaityn mindetterdi sapaly ári ýaqytyly oryndaý maqsatynda óńirlik arnaiy is-sharalar jospary ázirlenip, bekitiledi.
Prezident tapsyrmasyna sáikes, Túrkistan oblysynda tsifrlandyrý men jasandy intellekt tehnologiialaryn engizý basym baǵyt retinde belgilenip otyr. Osy maqsatta «Qazaqtelekom» jáne «Transtelekom» kompaniialarymen birlesip, eldi mekenderdi internetpen qamtý jumystary kúsheitiledi. Ár sala boiynsha tsifrlandyrýǵa arnalǵan naqty is-sharalar jospary ázirlenedi. Sonymen qatar mektepter men balabaqshalarda qaýipsizdikke baǵyttalǵan jasandy intellektke negizdelgen baqylaý júiesin engizý kózdelýde. IT mamandaryn daiarlaý úshin qyrkúiek aiynyń sońynda «Woosong Kazakhstan» IT ýniversiteti ashylady. Oblys ákimi atalǵan oqý ornymen tyǵyz bailanys ornatyp, naqty is-shara josparyn bekitýdi tapsyrdy.
– Memleket basshysy halyqqa Joldaýynda elimizdiń ekonomikalyq, áleýmettik jáne tehnologiialyq damýyn qamtityn jeti basym baǵytty naqty aiqyndap berdi. Jasandy intellektini damytýdan bastap, investitsiia tartýǵa deiingi áleýmettik -ekonomikalyq damýdyń strategiialyq mindetteri belgilendi. Endigi mindet – osy baǵyttar boiynsha naqty jobalar ázirlep, júieli jumys júrgizý. Prezident Joldaýy – ár salaǵa arnalǵan naqty baǵdar. Bul – jańa ekonomikalyq serpinniń negizi. Túrkistan oblysy Joldaýdaǵy barlyq baǵyttardy naqty istermen júzege asyrýǵa kúsh salady, – dedi oblys ákimi.
Nuralhan Kósherov Memleket basshysynyń tapsyrmalaryn oryndaý maqsatynda óńirde atqarylyp jatqan naqty jumystarǵa toqtaldy. Oblysta arnaiy investitsiia basqarmasy qurylyp, 2025–2028 jyldar aralyǵynda jalpy quny 2,5 trln teńge bolatyn 111 investitsiialyq jobany júzege asyrý josparlanýda. Bul jobalar nátijesinde 24 myńǵa jýyq jańa jumys orny ashylady dep kútilýde. 2025 jyldyń alǵashqy 7 aiynda negizgi kapitalǵa tartylǵan investitsiia kólemi 695 mlrd teńgeden asyp, jospar artyǵymen oryndaldy. Sonymen qatar «TURAN» arnaiy ekonomikalyq aimaǵynda sheteldik «HANYA» kompaniiasymen birlesip óndiristik park salý jumystary bastaldy. Oblys ákimi áleýmettik kásipkerlik korporatsiiany damý institýtyna ainaldyrý boiynsha naqty is-shara josparyn bekitýdi tapsyrdy.
N.Kósherov ishki jáne syrtqy naryqta básekege qabiletti, tereń óńdelgen ónim shyǵarýǵa basymdyq beriletinin aityp, óńdeý ónerkásibi salasyndaǵy 60,7 mlrd teńgeniń 18 jobasyn júzege asyrý jumystaryn jandandyrýdy tapsyrdy. Sondai-aq óńdeý ónerkásibine investitsiia tartý kólemin arttyrý boiynsha tiisti sharalardy qabyldaýdy mindettedi. Óńirde agroónerkásip keshenin damytý jáne agrobiznesti qoldaýǵa basymdyq berilýde. Sý únemdeý tehnologiialary 114 myń gektarǵa engizilgen. Memleket basshysynyń tapsyrmasyna sáikes, bul kórsetkishti 2030 jylǵa deiin 216 myń gektarǵa jetkizý kózdelýde. Sonymen qatar aýyl sharýashylyǵy jerlerin tsifrlyq formatta ádil úlestirý máselesi kún tártibine shyqty.
Keńes barysynda oblystyń kólik-logistikalyq áleýetin arttyrý máselesi de qaraldy. «Batys Eýropa – Batys Qytai» dálizi boiynda servistik infraqurylymdy damytý, jol sapasyn jaqsartý jáne kólik dálizderinen qosymsha tabys kózderin qalyptastyrý tapsyryldy. Sonymen qatar «Darbaza – Maqtaaral» temirjol jelisiniń qurylysyn merziminde aiaqtaý – erekshe baqylaýda.
Energetika salasynda oblystyń tutynatyn elektr qýatynyń 75%-y syrttan tasymaldanýda. Bul máseleni sheshý úshin jalpy qýaty 2,4 GVt bolatyn 6 iri joba iske asyrylýda. Qosymsha energiia kózderin tartý mindeti de qoiylyp otyr. Aýyz sý máselesi de keńinen talqylandy. Búgingi tańda Túrkistan oblysyndaǵy 801 eldi mekenniń 763-i (onyń ishinde 7 qala jáne 756 aýyl) nemese 98,1%-y ortalyqtandyrylǵan aýyz sýmen qamtylǵan. Ortalyqtandyrylǵan aýyz qubyry tartylmaǵan 38 eldi meken bar, 192 eldi mekende aýyz sý keste boiynsha beriledi. Keibir eldi mekenderde sý kózderiniń debeti azaiǵan, sý júieleri tozǵan. Bul máselelerdi sheshý úshin keshendi sharalar qabyldanýda. Prezidenttiń 2025 jylǵa deiin eldi mekenderdi 100% aýyz sýmen qamtamasyz etý jónindegi tapsyrmasy – basty mindetterdiń biri.
Sonymen qatar sanitarlyq tazalyq pen kógaldandyrý máselesine erekshe nazar aýdaryldy. Oblys ákimi tazalyq mádenietin qalyptastyrý maqsatynda «Turkistan TV» telearnasy túsirgen beinematerialdar negizinde jaýapty tulǵalarǵa qatysty kadrlyq sheshimder qabyldanatynyn eskertti.
Májiliste shaǵyn jáne orta biznesti damytý, tsifrlyq salyq júiesin engizý, áleýmettik kásipkerlik korporatsiialaryn damý institýtyna ainaldyrý syndy bastamalar talqylandy. Adam kapitalyn damytýǵa bailanysty joǵary oqý oryndary men kolledjderde bilikti kadrlar daiarlaý jumystary júielenetin boldy. Jasandy intellektke negizdelgen baǵdarlamalar mektep baǵdarlamasyna engiziledi.
Densaýlyq saqtaý salasynda Ordabasy jáne Saryaǵash aýdandarynda perinataldyq ortalyqtar salý úshin jobalyq-smetalyq qujattardy jedel ázirleý tapsyryldy. Sonymen qatar, 570 kópbeiindi aýrýhananyń qurylysyn jandandyrý baǵytynda naqty jumystar qolǵa alynady.
Jiyn qorytyndysynda oblys ákimi Prezident Joldaýynda qoiylǵan mindetterdiń árqaisysyn sapaly ári tiimdi oryndaý qajet ekenin atap ótip, jaýapty tulǵalarǵa naqty tapsyrmalar júktedi.
– Memleket basshysynyń tikelei baqylaýynda turǵan «Keleshek mektepteri» ulttyq jobasy aiasynda ótken jyly 13 mektep paidalanýǵa berilip, biyl jyl sońyna deiin qosymsha 16 mektep paidalanýǵa berilmek. Biyl paidalanýǵa tapsyrylatyn mektepterdiń qurylysyn merziminde aiaqtaýdy qamtamasyz etý qajet. Prezident Joldaýyndaǵy negizgi baǵyttarǵa arnaiy toqtaldym. Endi osy tapsyrmalardy merziminde jáne sapaly oryndaý úshin arnaiy is-sharalar josparyn ázirlep, bekitýdi tapsyramyn, – dedi oblys ákimi Nuralhan Kósherov.
