Túrkistan qalasynda rejisser Qanaǵat Mustafinniń «Qajymuqan» kórkem filminiń kórsetilimi ótti. Tarihi týyndynyń tanystyrylymyna Túrkistan oblysy ákiminiń orynbasary Ertai Altaev, filmniń avtorlary men akterlyq quramy, jergilikti ziialy qaýym men BAQ ókilderi arnaiy qatysty, dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
– Shyǵarmashylyq topty tarihi týyndymen shyn júrekten quttyqtaimyn! Osydan tórt jyl buryn túsirilimi bastalǵan film búgin elimizdiń barlyq kinoteatrynan kórermenge jol taýyp otyr. Biz osylaisha Qajymuqannyń ómirimen óskeleń urpaqty tanystyra alamyz. Onyń jetistikterin ulyqtai otyryp, úlgi alýymyz qajet, – dedi oblys ákiminiń orynbasary.
«Turan mall» saýda ortalyǵynyń «Prime Sinema» kinoteatrynda ótken kórsetilim aldynda filmniń qoiýshy rejissery Qanaǵat Mustafin, Qajymuqan rólin somdaǵan Erbol Tólepbergen, Qajymuqanyń jary rólindegi Jazira Erkin jáne filmniń prodiýserleri – Baýyrjan Qulmyrzaev, Nurjan Jumanov bastaǵan qonaqtar qyzyl kilemnen júrip ótti. Sodan soń shyǵarmashylyq top kórermenderge túsirilim barysy jaily baiandap berdi.
Film rejisseri Qanaǵat Mustafin tarihi film stsenariiine 2012 jyly kirisip, taqyrypty 10 jyldan astam ýaqyt zerttegen. Rejisserdiń aitýynsha, Qajymuqan óziniń myqtylyǵyn óz zamanynyń eń jaqsy balýandaryn jeńip dáleldegen. Ol – Parijde, Londonda, Berlinde, Ystambulda, Býenos-Aireste jáne Chikagoda qoshemetke bólengen alǵashqy qazaq sportshysy.
Aita keteiik, «Qajymuqan» atty tarihi kórkem filmi QR Mádeniet jáne aqparat ministrliginiń jáne Ulttyq kinony qoldaý memlekettik ortalyǵynyń qoldaýymen qazaq halqynyń tarihyndaǵy tuńǵysh kásipqoi balýan, frantsýz kúresinen álem chempiony atanǵan tuńǵysh qazaq, álemdik, óńirlik, reseilik, keiin búkilodaqtyq chempionattarynyń birneshe dúrkin jeńimpazy Qajymuqan Muńaitpasuly jaiynda túsirilgen. Sonymen birge dala batyrynyń halqyna degen súiispenshiligi, sol zamandaǵy saiasat, eldiń aýyr jaǵdaiy da sýrettelgen.
