Túrkistan oblysy Polısıa departamenti Ákimshilik polısıa basqarmasynyń bastyǵy, polısıa polkovnıgi Almas Tastanbekov oblys turǵyndarynda bar zańsyz qarýlardy aqshalaı syıaqyǵa ótkizýge múmkindik baryn túsindirdi.
– Ákimshilik polısıa qyzmetkerlerimen jyl basynan beri 3 ret «Qarý» jedel-profılaktıkalyq is-sharasy ótkizildi. Onyń sońǵysy 5-8 sáýir aralyǵynda uıymdastyrylyp, 4 táýlikte oblysta 18 ańshy qarýy tárkilendi. Sondaı-aq 3200-den astam qarý ıeleri tekserilip, 160 ákimshilik quqyq buzýshylyq anyqtaldy. Der kezinde anyqtalǵan quqyqbuzýshylyqtarǵa sáıkes hattamalar toltyryldy. Al sáýirdiń 20-sy kúninen bastap, oblysymyzda halyqtan zańsyz saqtalýdaǵy atys qarýyn, oq-dáriler men jarylǵysh zattardy satyp alý týraly arnaıy aksıa ótkizilmek. Memleket tarapynan osy úshin bizdiń oblysqa tıisti qarjy bólinip otyr. Sondyqtan, jergilikti turǵyndar qoldaryńyzda esh jerde tirkelmegen qarý túri bolsa, bizge ótkizip, syıaqyǵa ıe bolsańyz bolady, – dedi Polısıa polkovnıgi óz sózinde.
Qoljetimdi polısıa qaǵıdatyn qalyptastyrý úshin, mundaı is-sharalar aldaǵy ýaqytta da uıymdastyrylyp turatyn bolady. Aıta keteıik, departament tikeleı efır arqyly ár aptanyń juma kúni jıyn ótkizedi. Onda PD-niń árbir salalyq qurylym basshylary tikeleı efırge shyǵyp, ózderiniń basqarma, bólim qyzmetkerlerimen atqarylǵan jumystary men aldaǵy josparlaryn ashyq, ári naqty aıtyp ótýde.
Qarý-jaraq zattaryn erikti túrde tapsyrǵany úshin qarýdyń ár birligine onyń tehnıkalyq jaı-kúıine baılanysty komısıa sheshimine sáıkes somasy onnan júzge deıingi aılyq eseptik kórsetkish tólem kózdelgen. Syıaqy tólemi qarý-jaraq zattaryn tapsyrǵan adamdardyń shotyna aýdarý arqyly júzege asyrylatyn bolady.
Erikti túrde tirkelmegen atys qarýyn, oq-dárilerdi jáne jarylǵysh zattardy tapsyrǵan adamdar qylmystyq jáne ákimshilik jaýapkershikke tartylýdan bosatylady.
