Elimizdiń basty merekesi - Táýelsizdik toiyn Túrkistan oblysynyń jurtshylyǵy asqan qýanyshpen qarsy alyp jatyr. Ásirese, búgingi kún Ordabasy aýdany men Kentaý qalasynyń halqy úshin áleýmettik nysandardyń ashylýymen este qalmaq.
Qos aýdan, qala turǵyndarynyń qýanyshymen bólisýge barǵan oblys ákimi Janseiit Túimebaev, aldymen, Ordabasy aýdanyna at basyn buryp, Shubarsý aýylyndaǵy «MEDICAL CENTER SHUBARSU» meditsina ortalyǵynyń saltanatty ashylý rásimine kýá boldy.
Qurylysy 2016 jyly bastalǵan nysanda jalpy sany 115 stantsionarlyq tósek oryn bar. Meditsina ortalyǵynda terapiia, balalar bólimi, hirýrgiia jáne jaraqat bólimi, fizoterapiia jáne ońaltý bólimi, kúndizgi bólim, statsionar, zerthana jáne diagnostika bólimi, jedel járdem stansasy qyzmet kórsetedi. AQSh, Ońtistik Koreia, Vengriia, Iaponiia, Germaniia jáne bir qatar sheteldik jáne otandyq zamanýi meditsinalyq quraldarmen jabdyqtalǵan nysanda 145 adam jumyspen qamtylǵan.
Munan soń, oblys basshylyǵy bastaǵan top aýdan ortalyǵy - Temirlandaǵy «Jastar saraiynyń» ashylýyna qatysty. Búginde 20 shaqty jas mamandy jumyspen qamtyǵan ǵimaratta bolashaqta aýdan jastary túrli úiirmelerge qatysyp, bos ýaqytyn tiimdi paidalanatyn bolady.
"Táýelsizdiktiń torqaly toiynda Ordabasyda halyqqa óte qajetti eki nysan el igiligine berilip otyr. Onyń biri - jańa ózimiz kýá bolǵan meditsinalyq ortalyq bolsa, ekinshisi jastar úshin boi kóterip, jumysyn bastaǵan osynaý eńseli ǵimarat. Barshańyzǵa belgili, keler 2019 jyldy Elbasymyz "Jastar jyly" dep jariialady. Iaǵni, keleshegi kemel jastarymyzǵa memleket tarapynan barlyq jaǵdaidy jasaý jolynda búgingi ortalyq Ózderińizge amanat. Táýelsiz elimizdiń máńgilik el bolýǵa umtylǵan úmitin jalǵaityn, sol armanǵa jetkizetin de Ózderińiz. Maqsat-murattarymyzdyń júzege asýynda búgingi jastar saraiynyń Sizderge tigizer paidasy mol dep bilem", - dedi J.Túimebaev ondaǵy jalyndy jastarmen tildeskende.
Temirlan aýylyndaǵy eski kinoteatr ǵimaraty 2014 jyly jergilikti biýdjet esebinen jeke menshikten satyp alynǵan-dy. Sol kezde aýdan ákiminiń qaýlysymen nysan aýdandyq "Jastar resýrstyq ortalyǵy" kommýnaldyq memlekettik mekemesiniń teńgerimine ótip, kúrdeli jóndeýden ótti. Búginde jańarǵan nysan tehnikalyq bazamen tolyqtai qamtamasyz etilgen.
Túrkistan oblysy ákiminiń baspasóz qyzmeti
