Túrkistan qalasynda «Mereili otbasy – 2025» ulttyq baiqaýynyń oblystyq kezeńiniń jeńimpazdaryn marapattaý rásimi ótti. Bul baiqaý 12 jyldan beri respýblikalyq deńgeide turaqty túrde ótkizilip keledi.
Saltanatty sharaǵa oblys ákiminiń orynbasary Ertai Altaev qatysyp, jeńimpazdarǵa qurmet kórsetti.
– Memleket basshysy Qasym-Jomart Toqaev otbasylyq qundylyqtardy nyǵaitýdyń mańyzdylyǵyna jii toqtalyp keledi. «Mereili otbasy» baiqaýy – tek úzdik otbasylardy anyqtaityn jarys qana emes, bul – otbasy qundylyqtaryn nasihattap, urpaq tárbiesine, ulttyq tárbiege úlken úles qosyp júrgen otbasylardyń eńbegin elge tanytatyn úlken alań. Túrkistan oblysy 500 myńnan asa otbasy qonystanǵan óńir retinde demografiialyq ósimi eń joǵary aimaq bolyp esepteledi. Osy otbasylardyń uiytqysyna ainalǵan 187 myńnan asa kópbalaly analarymyzdy maqtanyshpen aita alamyz, – dedi Ertai Kenjebekuly.
Jalpy konkýrsqa 198 otbasy ótinim bergen. Aýdan, qalalyq deńgeide uiymdastyrylǵan baiqaýdyń alǵashqy kezeńinde 27 otbasy jeńimpaz atandy. Al, búgin oblys boiynsha úzdik dep tanylyp, januiadaǵy jarasymdylyq pen óziniń qarym-qabiletterimen erekshelenip, urpaqtar sabaqtastyǵynyń qaitalanbas úlgisin kórsetken 3 úzdik otbasy júzden júirik shyǵyp, «Mereili otbasy – 2025» ulttyq konkýrsynyń oblystyq kezeńinde top jaryp otyr.
Konkýrs qorytyndysyna sáikes 1 mln. teńge qarjylai júldesimen I oryn Moldabekovter otbasyna (Saýran aýdany) buiyrdy. II oryndy Shirimbaevtar otbasy (Túlkibas aýdany), III oryndy Rysbekovter otbasy (Keles aýdany) ielendi.
Jeńimpaz otbasyndaǵy Nurmahan Moldabekov 90 jasta. Saýran aýdany, Maidantal aýyldyq okrýgi, Yntaly eldi mekeninde dúniege kelgen. Zeinetker, tyl ardageri. Jubaiy Ońlasyn Júsipbaeva zeinetker, «Altyn alqa» iegeri. Úlgili otbasy 2 ul, 7 qyz, 35 nemere, 23 shóbere súiip otyr.
Aita ketsek, oblys ákimdiginiń uiymdastyrýymen ótken sharanyń maqsaty – qoǵamda otbasy institýtynyń rólin nyǵaitý, ulttyq qundylyqtardy dáripteý jáne óz isinde ónege bolǵan, úlgili otbasylardy nasihattaý.
