Búgin Túrkistan oblysynyń ákimi Darhan Satybaldy Ońtústik Koreianyń «Výsong» bilim berý qorynyń qurmetti tóraǵasy Kim Sýn Kiýnmen kezdesti. Qos tarap áriptestikti nyǵaitý joldaryn talqylap, Túrkistan qalasynda Ońtústik Koreianyń «Woosong» ýniversitetiniń filialyn ashý boiynsha kelisimge qol qoidy, dep habarlaidy Dalanews.kz Túrkistan oblysy ákiminiń baspasóz qyzmetine silteme jasap
– Qasietti Túrkistanǵa qosh keldińiz. Qazaqta «Bir kórgen – bilis, Eki kórgen – tanys» degen sóz bar. Ózińizben birneshe ret júzdesip, jaqyn adamǵa ainaldyq desek bolady. Tarihy men mádeni murasy mol ejelgi qala Túrkistan qarqyndy damyp, zamanaýi bilim berý jáne mádeni ortalyqqa ainalýda. Shaharymyzda «Výsong» ýniversitetiniń filialyn ashý osy joldaǵy mańyzdy kezeń ekeni daýsyz jáne munyń mýltiplikativti áseri zor bolatyny anyq. Sizdiń tájiribeńiz ben bilimińiz Túrkistan oblysyndaǵy bilim berý júiesin damytýǵa baǵa jetpes úles qosaryna senimdimiz. «Výsong» ýniversiteti jańa bilim berý standarttaryn ákelip qana qoimai, sonymen qatar aimaq ekonomikasynyń damýyna yqpal etetin innovatsiialyq jobalardy qurýdyń bastamasy bolady. Saýapty jobany bastaiyn dep otyrmyz. Bul oqý orny Túrkistan oblysy men Qazaqstannyń jastaryna múmkindike beredi. Jastarymyz oqyp, álemde ózderin tanytyp jatsa, bizge de abyroi. Jýyrda Koreia Prezidentimen kezdesýinde Memleket basshysy Qasym-Jomart Kemeluly osy oqý ornyn ashý bastamasyna arnaiy toqtalyp, qoldaý kórsetti. Búgingi osy jobamyzdyń kelisimine qol qoiý rásimi bizdiń qarym-qatynastarymyzdy jańa deńgeige kóteredi. Kelisimniń arqasynda birlese otyryp, kóptegen jańa jobalardy júzege asyryp, bilim berý salasynda mańyzdy jetistikterge qol jetkizemiz dep senemin. Biz osy mańyzdy jobany júzege asyrýǵa jan-jaqty qoldaý men kómek kórsetýge daiynbyz. Óitkeni, jobanyń júzege asýyna eń aldymen ózimiz múddelimiz, – dedi Darhan Satybaldy.«Výsong» bilim berý qorynyń qurmetti tóraǵasy Kim Sýn Kiýn óńir basshysyna alǵysyn jetkizdi.
– Tarih pen mádeniettiń ortalyǵy – Túrkistanǵa kelgenime qýanyshtymyn. Bizdiń oqý ornyn ashý baǵytyndaǵy kelisimimiz jumysty jedeldetedi. Sáýir aiynda Ońtústik Koreiaǵa arnaiy kelip, oqý ornyn ashý máselesi boiynsha kelissóz júrgizgenińizdi bilemiz. Osy qysqa ǵana ýaqytta kóp jumys atqaryp úlgergenińizdi kórip turmyn. «Výsong» ýniversitetiniń 70 jyldyq tarihy bar. 30 jyldan beri sheteldiń stýdentterin de qabyldap, bilim berýde. Biz óz tarapymyzdan Túrkistandaǵy ýniversitetti Ortalyq Aziiadaǵy kóshbasshy oqý oryndarynyń birine ainaldyrýǵa bar kúshimizdi salamyz. Stýdentterimizdiń básekege qabiletti, bilimdi bolýyna barlyq jaǵdaidy jasaimyz. Jobamyz sátti júzege asa bersin! – dedi ol.
Kezdesýde ekijaqty bailanysty nyǵaitý, jumys josparyn retteý, ýniversitetti ashý baǵytyndaǵy máseleler jan-jaqty talqylandy. Qos tarap bul joba boiynsha turaqty túrde aqyldasyp turýǵa ýaǵdalasty.
