Túrkistan oblysynda halyqty baspanamen qamtamasyz etý baǵytynda naqty jobalar iske asyrylyp jatyr. Jańa turǵyn úi keshenderi boi kóterip, kezekte turǵan otbasylar baspanalarmen qamtamasyz etilýde,- dep habarlaidy Dalanews.kz
Búgin Túrkistan qalasyndaǵy «Jibek joly» turǵyn úi kesheninde úilerdiń kezekti qurylysy aiaqtalyp, el igiligine paidalanýǵa berildi. Oblys ákimi Nuralhan Kósherov oblys ortalyǵy turǵyndarynyń qýanyshymen bólisip, 84 otbasyna baspana kiltterin tabystady.
– Sizderdi kele jatqan Ulttyq dombyra jáne Astana kúni merekelerimen shyn júrekten quttyqtaimyn! Táýelsizdiktiń taǵy bir jemisi – Túrkistan qalasynyń oblys ortalyǵy atanýy. Oblys ortalyǵy atanǵanyna 7 jyl endi tolsa da, Túrkistan qalasy kúlli túrki elderiniń rýhani astanasyna ainalyp, shaharǵa arnaiy zańmen erekshe mártebe statýsy berildi. Shahardyń kúnnen kúnge ajarlanyp, damýyna ózderińiz atsalysyp, kórkeiip kele jatqanyna kýá bolyp otyrsyzdar. Mereke qarsańynda memlekettiń qamqorlyǵy sizderdi taǵy bir qýanyshqa bólep otyr. Memleket basshysynyń bastamasymen elimizde baspanamen qamtý jumysy júrýde. Búgin qalamyzdyń turǵyndaryna baspanaly bolyp, jańa páterge qonystaný baqyty buiyrdy. Biz baspanamen qamtý jumysyn oblystaǵy barlyq aýdan, qalada jalǵastyramyz. Adam úshin eń keregi – baspana. Jańa qonystaryńyz qutty bolsyn! – dedi Nuralhan Oralbaiuly.
Oblys ákiminiń atynan jańa qonys ielerine páter kiltterimen qatar qasietti dombyra aspaby syiǵa tartyldy. Baspana «áleýmettik osal top» sanaty boiynsha turǵyn úi kezeginde turǵan azamattarǵa tabystaldy. Onyń ishinde, 48-i kópbalaly otbasylar bolsa, «álsiz top» sanatyndaǵy otbasylar – 36. Baspanaly bolyp, Dombyra kúni dombyraǵa ie bolǵan turǵyndar qýanyshtaryn jasyrmai, memlekettik qoldaýǵa rizashylyqtaryn bildirdi.
Aita keteiik, qazirgi tańda Túrkistan qalasynyń turǵyn úi kezeginde 16 myńnan astam azamat baspanaǵa muqtaj retinde tirkelgen. Byltyr 961 otbasy baspanamen qamtamasyz etilse, biyl 944 páterdi ielerine tapsyrý josparlanýda.
Baspana máselesin sheshý úshin belsendi jumystar jalǵasady.
