QR Eńbek sińirgen jattyqtyrýshysy, at sportynyń ardageri, KSRO-nyń toǵyz dúrkin chempiony, Túlkibas aýdanynyń qurmetti azamaty Ábilhan Daýylbaevtyń 75 jyldyq mereitoiyna orai uiymdastyrylǵan kókpardan respýblikalyq ashyq týrnir óz máresine jetti,- dep habarlaidy Dalanews.kz
Dúbirli dodaǵa elimizdiń ár óńirinen 8 komanda qatysyp, úsh kún boiy bas júldeni ózara sarapqa saldy. Jarysqa Túrkistan, Almaty, Qaraǵandy, Jambyl, Qostanai oblystary men Shymkent qalasy, sondai-aq Qazyǵurt jáne Merki aýdandarynyń tańdaýly shabandozdary qatysty.
Tartysty ótken saiys nátijesinde tórtinshi oryndy Almaty oblysynyń komandasy ielenip, temir tulparǵa ie boldy. Qola júlde Shymkent qalasynyń quramasyna buiyryp, shabandozdar 2 million teńge kólemindegi qarjylai syiaqyny qanjyǵalaryna bailady. Ekinshi oryndy enshilegen Túrkistan oblysynyń kókparshylaryna 3 million teńge kóleminde júlde tabystaldy. Al ulttyq oiynnyń maitalmandary – Jambyl oblysynyń quramasy qarsylastarynan oq boiy ozyp, bas júldege qol jetkizdi. Jeńimpaz komandaǵa 5 million teńgeniń sertifikaty tabystaldy.
Týrnir aiasynda úzdik oiynshylar da marapatsyz qalmady. «Úzdik oiynshy» ataǵy Jambyl oblysynyń shabandozy Erǵalym Jaqsylyqqa buiyrsa, Shymkent qalasynyń oiynshysy Ádilet Mamyt «Úzdik qorǵaýshy» atandy. Túrkistandyq Abylaihan Nyshanbekov «Úzdik shabýylshy» nominatsiiasymen marapattaldy. Al Shardaradan kelgen Seifýlla Nurhalyqovtyń «Saian» esimdi tulpary «Úzdik sáigúlik» atandy.
