Nasıhattyq toptardyń biri Saıram aýdana kelip, aýdan ortalyǵyndaǵy mádenıet úıinde jurtshylyqpen júzdesti. Elbasy Joldaýyndaǵy mindetterge keńinen toqtaldy. Óz kezeginde top jetekshisi, oblys ákiminiń orynbasary Ulasbek Sádibekov bıylǵy Joldaýdyń eldiń damýyna, halyqtyń ál-aýqatynyń artýyna yqpaly zor ekenin, ondaǵy mindetterdiń oryndalýyna barsha qazaqstandyqtardyń birlikpen úles qosýy kerek ekendigin aıtty.
Sonymen qatar, Ulasbek Sádibekov 2019 jyldyń jastar jyly bolyp jarıalanǵanyna toqtalyp, bul baǵytta jastarǵa úlken senim artylatyndyǵyn aıtty. Jıyn barysynda bilim salasyndaǵy jemqorlyq máselesi de sóz boldy.
– Elbasynyń jańadan qurylǵan oblysqa qarqyndy jumys bastaýdy mindettegeni – bizge senim bildirgeni. Memleket tarapynan sybaılas jemqorlyqqa qarsy kúres kúsheıtilip jatyr. Máselen, endi jumysqa qyzmetker qabyldaý kezinde mektep dırektory bul proseske qatysa almaıdy. Ony arnaıy qurylatyn mekeme júrgizetin bolady. Jalpy, óńirimizde bilimdi, bilikti muǵalimder óte kóp. Oqymysty oqýshylarymyz da jetkilikti. Biraq, bir ǵana jemqorlyq máselesi barlyǵyna túgel kúıe jaǵyp jiberedi. Sondyqtan, bul baǵytta jańasha jumys júrgiziletin bolady. Oǵan barlyǵymyz qoldaý bildirýimiz qajet, – degen oblys ákiminiń orynbasary saıramdyqtardan Joldaýdaǵy mindetterdi júzege asyrýda úlken úmit kútetindigin jetkizdi.
Joldaýdy túsindirý boıynsha qurylǵan aqparattyq-nasıhattyq top músheleri birneshe aýdan, qalaǵa baryp, turǵyndarmen júzdesti. Olar eldiń ótinishteri men pikirlerin tyńdap, Joldaýdaǵy basym baǵyttardy júzege asyrý jónindegi oılaryn ortaǵa saldy.
Túrkistan oblysy ákiminiń baspasóz qyzmeti
