ناسيحاتتىق توپتاردىڭ ءبىرى سايرام اۋدانا كەلىپ، اۋدان ورتالىعىنداعى مادەنيەت ۇيىندە جۇرتشىلىقپەن جۇزدەستى. ەلباسى جولداۋىنداعى مىندەتتەرگە كەڭىنەن توقتالدى. ءوز كەزەگىندە توپ جەتەكشىسى، وبلىس اكىمىنىڭ ورىنباسارى ۇلاسبەك سادىبەكوۆ بيىلعى جولداۋدىڭ ەلدىڭ دامۋىنا، حالىقتىڭ ءال-اۋقاتىنىڭ ارتۋىنا ىقپالى زور ەكەنىن، ونداعى مىندەتتەردىڭ ورىندالۋىنا بارشا قازاقستاندىقتاردىڭ بىرلىكپەن ۇلەس قوسۋى كەرەك ەكەندىگىن ايتتى.
سونىمەن قاتار، ۇلاسبەك سادىبەكوۆ 2019 جىلدىڭ جاستار جىلى بولىپ جاريالانعانىنا توقتالىپ، بۇل باعىتتا جاستارعا ۇلكەن سەنىم ارتىلاتىندىعىن ايتتى. جيىن بارىسىندا ءبىلىم سالاسىنداعى جەمقورلىق ماسەلەسى دە ءسوز بولدى.
– ەلباسىنىڭ جاڭادان قۇرىلعان وبلىسقا قارقىندى جۇمىس باستاۋدى مىندەتتەگەنى – بىزگە سەنىم بىلدىرگەنى. مەملەكەت تاراپىنان سىبايلاس جەمقورلىققا قارسى كۇرەس كۇشەيتىلىپ جاتىر. ماسەلەن، ەندى جۇمىسقا قىزمەتكەر قابىلداۋ كەزىندە مەكتەپ ديرەكتورى بۇل پروسەسكە قاتىسا المايدى. ونى ارنايى قۇرىلاتىن مەكەمە جۇرگىزەتىن بولادى. جالپى، وڭىرىمىزدە ءبىلىمدى، بىلىكتى مۇعالىمدەر وتە كوپ. وقىمىستى وقۋشىلارىمىز دا جەتكىلىكتى. ءبىراق، ءبىر عانا جەمقورلىق ماسەلەسى بارلىعىنا تۇگەل كۇيە جاعىپ جىبەرەدى. سوندىقتان، بۇل باعىتتا جاڭاشا جۇمىس جۇرگىزىلەتىن بولادى. وعان بارلىعىمىز قولداۋ ءبىلدىرۋىمىز قاجەت، – دەگەن وبلىس اكىمىنىڭ ورىنباسارى سايرامدىقتاردان جولداۋداعى مىندەتتەردى جۇزەگە اسىرۋدا ۇلكەن ءۇمىت كۇتەتىندىگىن جەتكىزدى.
جولداۋدى ءتۇسىندىرۋ بويىنشا قۇرىلعان اقپاراتتىق-ناسيحاتتىق توپ مۇشەلەرى بىرنەشە اۋدان، قالاعا بارىپ، تۇرعىندارمەن جۇزدەستى. ولار ەلدىڭ وتىنىشتەرى مەن پىكىرلەرىن تىڭداپ، جولداۋداعى باسىم باعىتتاردى جۇزەگە اسىرۋ جونىندەگى ويلارىن ورتاعا سالدى.
تۇركىستان وبلىسى اكىمىنىڭ باسپا ءسوز قىزمەتى
