Túrkistan qalasyndaǵy «Jeńis» saiabaǵynda Jeńistiń 79 jyldyǵyna arnalǵan merekelik is-shara ótti. Oǵan oblys ákimi Darhan Satybaldy, soǵys jáne tyl ardagerleri, áskeriler, jastar jáne qala turǵyndary qatysty, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Saiabaqtaǵy memorialdyq kesheni taqyrypqa sai bezendirilip, kelýshilerge Otan qorǵaýshylar men Jeńis kúnine arnalǵan kórme usynyldy.
Arnaiy áskeri orkestr súimeldeýinde Qazaqstan Respýblikasynyń Memlekettik Ánurany oryndalǵan soń jiynǵa qatysýshylar Uly Otan soǵysynda qaza tapqan erlerdi, el basyna kún týǵan kezde ómirin qurban etken jaýyngerlerdi bir minýt únsizdikpen eske aldy. El azamattary eskertkishke gúl shoqtaryn qoidy. Túrkistan oblysynyń ákimi kópshilikti Jeńis kúnimen quttyqtap, bul merekeniń mańyzyna toqtaldy.
– Barshańyzdy Jeńis kúnimen shyn júrekten quttyqtaimyn! Dańqty qolbasshy Baýyrjan Momyshuly «Erlik – taisalmas tabandylyq pen qaiyspas qaisarlyqtan shyǵady» dei kele azamattardy erlik jasaýǵa shaqyrǵan. Bul rette Qazaqstanymyz erjúrek batyrlarymen maqtanady.
Memleket basshysy Qasym-Jomart Toqaevtyń Jeńis kúnimen quttyqtaýynda «Qazaqstan adamzattyń ortaq jeńisine, jer betinde ádildik pen bostandyqtyń saltanat qurýyna ólsheýsiz úles qosty. Aǵa býynnyń ekinshi dúniejúzilik soǵys kezindegi erligi men eńbegi óskeleń urpaq úshin qaisarlyqtyń, janqiiarlyqtyń jáne otanshyldyqtyń ozyq úlgisi bolyp qalatyny sózsiz» – dedi. Biyl Uly Jeńiske 79 jyl tolyp otyr. Adamzat tarihyndaǵy eń alapat sol maidanda qazaq halqy sheshýshi ról atqarǵany belgili.
Elimizdiń erjúrek jigitteri men qaisar qyzdary álemde beibitshilik týyn jelbiretý úshin qan tókti. Erlik kórsetip, Uly Jeńiske úles qosty. Tylda eńkeigen qariia men balalardyń ózi kúndiz-túni eńbek etip, jeńisti jaqyndatty. Sondyqtan Uly Otan soǵysynyń ardagerlerine qurmet kórsetý, olardyń erlikterin urpaqqa dáripteý – ortaq mindet. Óitkeni, biz – jeńimpaz býynnyń urpaǵymyz! Ardagerlerimizge, olardyń urpaqtaryna amandyq, shattyq tileimin! Biyl Keńes odaǵynyń batyry, alǵashqy Qorǵanys ministri Saǵadat Nurmaǵambetov pen Halyq Qaharmany, Reihstagqa tý tikken Raqymjan Qoshqarbaevtyń týǵanyna 100 jyl tolyp otyr. Qos qaharmannyń erlikke toly ómiri – urpaq úshin ónege! Biz ardagerlerimizdiń erligin umytpaimyz jáne máńgi este saqtaimyz! Elimizde árqashan beibitshilik zaman, urpaǵymyz aman bolsyn! Táýelsiz elimizdiń mártebesi biiktei bersin! – dedi Darhan Satybaldy.
Jeńis kúnine orai oblys ákimi Darhan Satybaldy 102 jastaǵy túrkistandyq ardager Nemet Ábdirasilovtyń úiine arnaiy baryp, el Prezidenti Qasym-Jomart Toqaevtyń quttyqtaýyn jetkizdi. Ekinshi dúniejúzilik soǵysynyń ardagerine syi-qurmet kórsetti.
Aita keteiik, Ońtústik óńirinen Ekinshi dúniejúzilik soǵysqa 140 myńnan astam azamat attanyp, teń jartysy sheiit boldy. Onyń ishinde 51 jaýynger Keńes odaǵynyń batyry atansa, 8 maidanger III dárejeli «Dańq» ordeniniń kavaleri ataǵyn alǵan.
Oblystyń barlyq aýdan, qalalarynda Jeńis kúninde otanshyldyqty dáripteitin is-sharalar uiymdastyrylyp, jaýyngerlerge, qazirgi ardagerlerge qurmet kórsetildi. Otansúigishtikti dáripteý maqsatynda aldaǵy ýaqytta jastardyń qatysýymen is-sharalar ótkizý josparlanýda.
