Túrkistan oblysy ákiminiń orynbasary jekemenshik mektepterdiń direktorlarymen kezdesý ótkizdi. Jiynda ózekti máseleler talqylanyp, usynys-pikirler aityldy,- dep habarlaidy Dalanews.kz
Jiyndy bilim oshaqtarynyń reitingi, ustazdardyń sapalyq quramy jaily taldaýlardyń nátijeleri sóz boldy. Ulttyq bilim berý derekter qorynyń málimetterine súiensek, ortasha kórsetkishte barlyq jekemenshik mektepterdiń belgilengen biliktilik talaptaryna sáikes emes. Oǵan kei bilim berý uiymdarynyń derekterdi durys toltyrmaýy jáne jańartpaýy áser etip otyr. Sondai-aq oblystyq bilim basqarmasy basshysynyń orynbasary Jandos Mahanbetovtiń málimdeýinshe, mektep basshylary 3 jylda keminde 1 ret menedjment boiynsha biliktilikti arttyryp otyrýǵa tiis. Degenmen bul mindet tiisti deńgeide oryndalmaǵan. 102 mektepten 902 muǵalim kýrstan ótse, 66 mektep úilestire almaǵan. BilimClass elektrondyq jýrnaly da zerdelenip, 30-ǵa jýyǵy tirkelmegeni anyqtaldy. Bilim sapasy 60,05%-dy qurasa, úlgerimi - 99,96% paiyz.
Qazirgi tańda oblystaǵy 157 jekemenshik mektep memlekettik tapsyrys alý arqyly qyzmet etýde. Onda jalpy 47 myńnan astam bala oqidy. QR «Qarjy ortalyǵy» AQ bilim berý salasyndaǵy ýákiletti organnyń operatory bolyp keldi. Biyl 1 qańtardan bastap qarjylandyrý nysanaly transfert retinde oblystyq biýdjet esebinen júzege asyrylýda. Beisenbai Dáýletuly shtattyq qyzmetkerler men pedagogtardyń jalaqysyn tóleý máselesi únemi baqylaýda ekenin jetkizdi. Májiliste baiandamalar tyńdalyp, suraq-jaýap bólimine ulasty. Kóterilgen problemalar men usynystar nazarǵa alyndy.
Túrkistan óńirinde 170-ke jýyq bilim berý uiymy jumys isteidi. Onda 51 myńnan astam oqýshy bilim alyp jatyr. Bul mektepterde 3435 pedagog eńbek etip keledi.
