Biyl qazaqtyń uly oishyly, aqyny Abai Qunanbaiulynyń týǵanyna 180 jyl tolyp otyr. Osy aitýly merekege jáne «Jastar kúnine» orai Túrkistanda rýhani máni bar is-shara ótti,- dep habarlaidy Dalanews.kz
Abai eskertkishi mańynda uly oishyldyń ómiri men shyǵarmashylyǵynan syr shertetin kóshpeli kitap kórmesi ótkizildi. Sonymen birge oblys ákimi Nuralhan Kósherov óńirdiń belsendi jastarymen kezdesip, Muhtar Áýezovtiń «Abai joly» kitabyn tapsyrdy.
– Memleket basshysy Qasym-Jomart Kemeluly ár shańyraqta Abaidyń kitaby men men Muhtar Áýezovtyń «Abai joly» romany turýy kerek ekenin aitqan bolatyn. Sol bastamany Túrkistan oblysynda iske asyrý maqsatynda qonaqtarǵa, jastarǵa «Abai joly» romany toptastyrylǵan tórt tomdyq kitaptardy tapsyrýdy jón kórdik. Bul kitapty ár oqyǵan saiyn jańa dúnielermen tanysasyń, jańasha oi túiesiń. Jastarymyz da kitapty oqyp, Abai ómiriniń tereńine úńiledi dep oilaimyn, – dedi Nuralhan Kósherov.
Belsendi jastar óńir basshysynyń rýhani máni bar syilyǵyna rizashylyqtaryn bildirip, Abai murasyna adal bolatyndaryn jetkizdi. Jalpy, 180 jyldyqqa 180 kitap toptamasy shyǵarylyp, jastar men turǵyndarǵa úilestirildi.
Aita keteiik, osy kúni uiymdastyrylǵan kitap kórmesinde Abai Qunanbaiulynyń ómirinen, shyǵarmashylyǵynan syr shertetin mańynaly dúnieler usynyldy. Abai Qunanbaiuly beinelengen, erekshe sheberlikpen tigilgen qabyrǵaǵa iletin kilemshe de kópshiliktiń qyzyǵýshylyǵyn oiatty. Bul syilyqty kitaphanaǵa «Bal tekstil» kompaniiasy tartý etken.
Osylaisha, Túrkistan jastary «Abai kúni» men «Jastar kúni» merekelerin rýhani-tanymdyq is-sharamen órnektep, erekshe serpilip qaitty.
