Túrkistan qalasy taǵy bir demalys aimaǵymen tolyqty. Búgin shahardyń Ákimshilik-iskerlik ortalyǵynan boi kótergen jasandy kóli bar saiabaq paidalanýǵa tapsyryldy. Jańa nysannyń ashylý saltanatyna oblys ákimi Nuralhan Kósherov qatysyp, turǵyndarǵa izgi tilegin jetkizdi.
– Búgin biz balalardy qorǵaý kúni merekesi qarsańynda Túrkistan tórinde tabiǵatpen tyǵyz bailanys ornatatyn, demalyp serýendeitin taǵy da bir saiabaqtyń ashylýyna kýá bolyp turmyz. Qala turǵyndary men qonaqtaryna jaily orta qalyptastyrý – bizdiń basty maqsattarymyzdyń biri. Memleket basshysy Qasym-Jomart Kemeluly «Elimizdi kógaldandyrý, abattandyrý – úlken memlekettik mańyzy bar is. Bul – jalpyulttyq másele. Qazaqstanymyz taza bolýy qajet» dep aitqan bolatyn. Al, bul saiabaq – qalanyń ekologiialyq, týristik áleýetin arttyrýǵa baǵyttalǵan tyń jobalardyń biri.
Saiabaq Túrkistannyń jasyl qalaǵa ainalýyna úlken septigin tigizedi. Jalpy Túrkistanda 109 saiabaq pen skverler qyzmet kórsetýde. Al, búgin ashylǵan saiabaǵymyz 110-shy bolyp otyr. Bul jobany iske asyrýǵa atsalysqan barlyq mamandarǵa, qurylysshylarǵa alǵysymdy bildiremin. Sizderdiń eńbekterińiz – elge qyzmet etýdiń jarqyn belgisi. Aimaqta jyl sanap týrister sany ósip keledi. Demalys oryndary da ashylýda. Osylardyń barlyǵy Túrki áleminiń ortalyǵy Túrkistan qalasynyń damýyna oń serpin beredi. Sizderdi jańa saiabaqtyń ashylýymen taǵy da shyn júrekten quttyqtaimyn! – dedi Nuralhan Kósherov.
Qalalyq saiabaqta Túrkistan qalasynyń erekshe mártebesine jáne 1 maýsym – Halyqaralyq balalardy qorǵaý kúnine orai uiymdastyrylǵan merekelik kontsert ótti. Qala turǵyndary men qonaqtarynyń nazaryna bi jáne teatrlandyrylǵan qoiylymdar usynylyp, áýezdi ánder oryndaldy. Serik Ibragimov, Nurjan Júsipbekov, Gúlmira Qudaibergenova jáne basqa da elimizge tanymal ánshiler men dombyrashy balalar toby óner kórsetti. Sonymen qatar «Kúltegin» etno-folklor ansambli men «Jastar» jáne «Jańa lep» ujymy, «Semser» toby halyq ánderi men zamanaýi týyndylar oryndap, kóterińki kóńil kúi syilady.
Saltanatty shara barysynda balalar men eresekterge arnalǵan interaktivti aimaqtar uiymdastyryldy. Atap aitqanda, tsirk, animatorlar jáne armandar shary shoýy kórsetilip, sporttyq jarystar, sýret jáne qyshtan buiym jasaý sheberlik saǵattary ótti.
Qalalyq saiabaq «Jańa qala» aýmaǵynda 12,77 gektar jerde ornalasqan. Saiabaqta 38 438 sharshy metr jer kógaldandyrylǵan. 8 myńǵa jýyq tal men jasyl ekpe egilgen. Jasandy kól 19500 sharshy metr aýmaqty qamtidy. Sý syiymdylyǵy – 60 000 m3. Kól ústinen uzyndyǵy 92 metr jaiaý júrginshiler kópiri salynǵan. Sonymen qatar kól ústinde sholý alańy, sarqyrama, sýburqaqtar bar.
Demalys aimaǵynda tamaqtanatyn oryndar, balalar alańshalary, ákimshilik ǵimaraty qarastyrylǵan. Odan bólek, shatyrlar, jaryqshamdar, 270 dana oryndyq pen 240 dana qoqys jáshigi ornatylǵan. Saiabaq bir kúnde 600 adamǵa deiin qabyldai alady. Munda turǵyndar men qala qonaqtarynyń jaily demalysy úshin barlyq jaǵdai qarastyrylǵan.
