Túrkistanda Eńbek kúnine orai «Adal azamat – adal eńbek» atty saltanatty is-shara ótti. Atalǵan sharaǵa oblys ákiminiń orynbasary Beisenbai Tájibaev qatysyp, eńbek adamdaryna qurmet kórsetti, dep habarlaidy Dalanews.kz
– Bul mereke – qoǵamnyń damýy men eldiń órkendeýine ólsheýsiz úles qosyp kele jatqan eńbek adamdaryna degen shynaiy qurmet pen izettiń kórinisi. Memleketimizdiń basty mindeti – halyqty nátijeli jumyspen qamtý arqyly olardyń ómir sapasyn kóterý. Memleket basshysy jariialaǵan «Jumysshy mamandyqtar jyly» aiasynda eńbek adamyn qoldaý, jumysshy kásibiniń mártebesin kóterý – basty maqsattarymyzdyń biri. Oblys turǵyndaryn laiyqty jumyspen qamtý maqsatynda Óńirlik jumyspen qamtý kartasy jasaqtalyp, osy jyly 130 myńnan astam turǵyndy jumyspen qamtý mejelendi. Qazirgi tańda 101 myńǵa jýyq azamat jumyspen qamtyldy, onyń 35 myńnan astamy – jumysshy mamandyq ieleri. Ulttyq jobalar aiasynda 3 156 azamat jumysqa ornalasty. Jeke investitsiia arqyly 1 584 jańa jumys orny ashyldy. «10 myń turǵynǵa – 100 jańa jumys orny» jobasy boiynsha 27 myńnan asa jumys orny ashylyp, 29 myńnan asa azamat jumyspen qamtyldy. Jańa biznes ideialardy júzege asyrý úshin 1788 azamat 400 AEK kóleminde memlekettik qaitarymsyz grant qarajatymen qamtyldy, – dedi Beisen Tájibaev.
Is-shara aiasynda «Paryz – 2025» jáne «Eńbek Joly – 2025» konkýrstarynyń óńirlik jeńimpazdary marapattaldy. Olardyń qatarynda «Kazatomprom- SaUran» JShS, «M. Iýldashev atyndaǵy sport mektebi», «KAP Logistics» JShS, «Kórkem Aimaq» JShS jáne eńbek ozattary: Derbisovter áýleti, Ǵalymjan Baidosov pen Gýlaihon Ermanova bar.
40-qa jýyq jumys berýshi qatysqan «Bos jumys oryndary jármeńkesinde» turǵyndarǵa 1000-nan astam bos jumys orny usynyldy. Injenerden bastap IT-mamanǵa deiin 50-den astam mamandyq qamtyldy.
Aita keteiik, 2025 jyl óńirde «Jumysshy mamandyqtar jyly» bolyp jariialanyp, jyl basynan beri 64 jármeńke uiymdastyrylyp, 2 344 azamat jumyspen qamtyldy. Jalpy 8 aidyń qorytyndysymen oblysta 100 myńnan astam adam eńbekke tartyldy. Odan bólek, oblys aýmaǵyndaǵy 39 iri óndiris oryndarynda ashyq esik kúnderi uiymdastyrylyp, oǵan 7 myńnan astam mektep oqýshysy, 5 myńǵa jýyq tehnikalyq jáne kásiptik bilim alýshy men 3500 jumys izdeýshi qatysty.
