Túrkistan oblystyq máslıhatynyń tóraǵasy Nuraly Ábishov bastaǵan ýaqytsha depýtattyq komısıa músheleri, ıaǵnı oblystyq máslıhat depýtattary Almas Salımov, Qalyıma Jantóreeva, Begimbet Baıǵaraev, Ǵalymjan Elshibaı, Bekarys Shoıbekov Talǵat Sadýov oblystaǵy týrızm nysandarynyń jaı-kúıimen tanysty, dep habarlaıdy Dalanews.kz.
Alǵashqy nysan «Qarataý» qoryǵyndaǵy «Hantaǵy» týrısik-rekreasıalyq aımaǵy. Erekshe tabıǵatymen eko-týrızmdi damytýǵa qolaıly mekende «Vızıt» ortalyǵyn salý josparlanýda. Joba keler jyly bastalady, quny - 150 mln teńgeni quraıdy. Vızıt ortalyq PROGREEN jobasy sheńberinde iske asyrylatyn bolady.
Aralaý barysynda ortalyqty salýǵa arnaıy jer bólý máselesi aıtyldy. Halyq qalaýlylary bul baǵytta tıisti sharalar atqarylyp, máseleniń ońynan sheshilýine yqpal jasaıtyndaryn jetkizdi.
Sondaı-aq, depýtattar «Hantaǵy» týrısik-rekreasıalyq aımaǵyn nasıhattaý, kelýshiler úshin sapaly qyzmet kórsetý, ulttyq naqyshtaǵy jáne zamanaýı baǵyttaǵy demalys oryndaryn arttyrý jáne tazalyqqa erekshe kóńil bólý kerektigin aıtty.
Ýaqytsha depýtattyq komısıa Túrkistan qalasyndaǵy týrısik-rekreasıalyq aımaqtyń da jaı-kúıin kórdi. Joba Túrkistan oblysynyń 2025 jylǵa deıingi áleýmettik-ekonomıkalyq damýynyń keshendi jospary aıasynda júzege asyrylýda.
«Túrkistan» týrısik-rekreasıalyq ortalyǵynyń ınjenerlik ınfraqurylymyn salý jobasy jasandy kól men jaǵajaı aýmaǵy bar kópfýnksıaly týrısik aımaqty qurýdy qamtıdy. Joba aıasynda eki kezeń qarastyrylǵan: İ kezeń – saıabaq salý, aýmaqty fýnksıonaldy aımaqtarǵa bólý, belsendi demalys aımaǵy, balalar oıyn alańy, sport ınfraqurylymy bolsa, İİ kezeń – «Shaǵa» kóliniń jáne oǵan irgeles týrısik aýmaqtyń ınjenerlik ınfraqurylymyn salý. Jobanyń jalpy smetalyq quny 9,3 mlrd teńgeni quraıdy, onyń ishinde 9,1 mlrd teńge kelisimsharttar aıasynda qarastyrylǵan.
Qazirgi ýaqytta «Gold Fish City Turkistan» JSHS jeke seriktesimen jaǵajaı aımaǵyn damytý, týrısik qyzmet kórsetý, qonaqúı jáne meıramhana ınfraqurylymyn salý máseleleri boıynsha belsendi kelissózder júrgizilýde. Investor tarapynan salynatyn boljamdy ınvestısıa kólemi – 5 mln AQSH dollaryn quraıdy.
«Shaǵa» jasandy kóliniń sýmen qamtylý jaǵdaıy men jumys isteýi turaqty deńgeıde. Kól jyl saıyn kóktemgi jáne kúzgi kezeńderde Kensaı-Koskorgan-2 sý qoımasynan Túrkistan magıstraldyq kanaly arqyly keletin sý esebinen toltyrylady.
Kensaı-Koskorgan-2 sý qoımasy Túrkistan qalasyndaǵy eskek esý kanalynyń da sý kózi bolyp tabylady. Osylaısha, «Shaǵa» kóli men eskek esý arnasy bir senimdi sý kózinen qorektenedi, bul nysandardyń sý tapshylyǵy máselesin boldyrmaıdy.
Jobanyń maqsaty – ishki týrızmdi damytý, Túrkistan oblysynyń ınvestısıalyq tartymdylyǵyn arttyrý, óńir turǵyndary men qonaqtaryna demalys jaǵdaılaryn jaqsartý, sondaı-aq sý tasqyny sýlarynan qorǵanýdy qamtamasyz etý.
Aıta keteıik, oblystyq máslıhattyń 2025 jylǵa arnalǵan jumys josparyna sáıkes aldaǵy kezekti sesıada oblystyq týrızm basqarmasy basshysynyń esebi tyńdalady.
