Túrkistan qalasynda biyl 944 páterli 11 turǵyn úidi paidalanýǵa berý josparlanǵan. Jyl basynan beri josparǵa sáikes, 4 úidiń qurylysy aiaqtalyp, 348 páter óz iesin tapty. Budan bólek, nesie júiesimen 2025 jyly jalpy 2 082 páterdi paidalanýǵa berý josparlanǵan, – dep habarlaidy Dalanews.kz
«Búgingi tańda, Túrkistan qalasy boiynsha turǵyn úi kezeginde turǵan azamattar sany – 17 058. Onyń 6 487-si – álsiz top músheleri bolsa, 5 185-i – kópbalaly otbasylar, 181-i – tul jetim sanatyndaǵylar. Sondai-aq, 5 203 otbasy biýdjet esebinen baspanaly bolýǵa kezekte tursa, 2 úi apatty jaǵdaida dep tanylýyna bailanysty jańa úi alý kezegine tirkelgen. Jańa Zańǵa sáikes, 2025 jyldyń 24 mamyrynan bastap sanatyna qaramastan, sońǵy 5 jylda atynda turǵyn úii joq azamattar úi kezegine turý múmkindigine ie bola alady. Sondai-aq, memlekettik turǵyn úi qorynan beriletin úilerdi jekeshelendirý týraly qaǵidalaryna da birqatar ózgerister engizilgen. Jańa ózgeristerge sáikes, birneshe sanattaǵy azamattar memlekettik turǵyn úi qorynan ózderi turatyn baspanalardy óz menshigine óteýsiz alýǵa múmkindik alyp otyr» - dedi Túrkistan qalasy ákiminiń orynbasary Talǵat Tólegenov.
Sonymen qatar, Túrkistan qalasynda «Otbasy bank» arqyly kredittik júiemen 2025 jyly jalpy 2082 páterdi paidalanýǵa berý josparlanyp otyr. Bul týraly brifingte Túrkistan oblystyq «Otbasy bank» AQ filialy direktorynyń orynbasary Dáýren Myrzataev aitty. Atalǵan turǵyn úilerge ótinishter úi kezekte Túrkistan oblysy boiynsha turǵan Bank salymshylarynan qabyldanady. Qazirgi tańda atalǵan bank arqyly 1 016 páterdiń sharshy metri 180 myń teńgeden bolsa, 1 066 páterdiń sharshy metri 220 myń teńgege baǵalanyp otyr.
