Túrkistanda bes juldyzdy qonaq úidiń qurylysy bastaldy
Túrkistan oblysynyń ákimi Janseiit Túimebaev «Qala kúni» merekesiniń qarsańynda «RIXOS KHADISHA TURKESTAN» bes juldyzdy qonaq úiiniń kapsýlasyn salý rásimine qatysty.
Onda qonaq úi keshenin jobasymen tanysyp, qurylys jumystaryn saltanatty jaǵdaida bastap berdi. Jiynda barysynda aimaq basshysy atqarylyp jatqan bul sharalar – Túrkistan qalasyn túrki áleminiń mádeni astanasy etýdiń alǵy sharty ekenin atap ótti.
– Bizdiń oblys tarihi-mádeni muralar men eskertkishterge bai óńir. Mundai jerlerge týrister kóptep aǵylatyny málim. Sondyqtan da biz týristik infraqurylymdy barynsha jaqsarta túsýimiz kerek. Iaǵni, sheteldik qonaqtardy joǵary deńgeide kútip alý úshin óńirdegi áýejai jáne temir jol jelilerinde sapaly qyzmetter kórsetilýi tiis. Bul turǵyda qonaq úilerdiń de deńgeii joǵary bolýy úlken mánge ie. Demek, qalamyz qonaqtardyń júrip-turýyna yńǵaila bolsa, keletin týristerdiń sany da arta túsedi. Osy rette, óz qarajaty esebinen osyndai záýlim ǵimarat salǵaly jatqan Serikjan Seitjanov myrzaǵa alǵys bildiremin, – dedi Janseiit Qanseiituly.
120 orynǵa shaqtalǵan qonaq úi 3 gektar aýmaqta boi kóteredi. 6 qabattan turatyn ǵimaratta 3 birdei meiramhana, kinoteatr jáne isker top ókilderi úshin biznes ortalyqtar josparlanǵan. Jobanyń jalpy quny 10 mlrd. teńgeni quraidy. Jospar boiynsha qurylys jumystary 2019 jyldyń jeltoqsan aiynda aiaqtalady dep kútilýde.
Budan bólek, oblys ákimi «ROYAL GRAND HOTEL» qonaq úiiniń ashylýyna qatysty. 2016 jyly qurylysy bastalǵan ǵimarattyń jalpy aýmaǵy 1,5 myń sharshy metr. Qonaq úi táýligine 60 adamǵa qyzmet kórsetedi.
Zamanaýi qural-jabdyqtarmen qamtylǵan qonaq úi kesheninde kishi market, shashtaraz, dámhana, monsha jáne dárihana jumys isteidi. Odan bólek, munda qonaqtarǵa arnalǵan jeke avtoturaq qarastyrylǵan.
Túrkistan oblysy ákiminiń baspasóz qyzmeti
