Álemniń Olımpıadalyq astanasy – Lozanna qalasynda (Shveısarıa) 13-16 naýryz aralyǵynda Halyqaralyq eskek esý federasıasynyń (FISA) Dúnıejúzilik kongresi ótti. Sıez jumysyna FISA federasıasynyń prezıdenti Jan-Krıstof Rollannyń shaqyrýymen Túrkistan oblysy jáne Shymkent qalasy eskek esý jáne jelken sporty qaýymdastyǵynyń tóraǵasy, Túrkistan oblystyq sý sporty túrlerinen olımpıadalyq sport mektebiniń dırektory Denıs Jármenov qatysty, dep habarlaıdy Dalanews.kz
Denıs Jármenov 62 eldiń halyqaralyq federasıa basshylaryna Túrkistan qalasynda olımpıadalyq standarttaǵy jańa eskek esý arnasyn tanystyrdy. Halyqaralyq federasıa prezıdenti Jan-Krıstof Rollanmen, sondaı-aq Azıa federasıasynyń prezıdenti Chen Chanchınmen kelissózder nátıjesinde 2026 jyly Túrkistan qalasynda eskek esýden Azıa chempıonatyn ótkizý týraly kelisimge qol jetkizildi.
Qazaqstanda eskek esý sportynyń damý tarıhynda alǵash ret osyndaı halyqaralyq deńgeıdegi jarystar ótedi. Baıraqty dodada 17 elden 300-den astam sportshy 4 kún boıy ártúrli baǵdarlamalar boıynsha chempıon ataǵyn sarapqa salady. Azıa chempıonatynyń sátti ótýi Túrkistanda joǵary deńgeıdegi jarystardy uıymdastyrýǵa múmkindikter ashady.
Eskek esý - elıtalyq sport túri. Qurlyqtyq jáne halyqaralyq jarystardy ótkizý Qazaqstannyń álemdik sport arenasynda ımıjin nyǵaıtady jáne esý sporty men týrızmdi damytýǵa serpin beredi.
