«Kerýen sarai» kesheninde «Túrkistan – Túrki áleminiń rýhani astanasy» taqyrybymen óńirdiń týristik maýsymy ashyldy. Oblystyń týristik áleýetin, infraqurylymyn jaqsartý jáne qonaqtarǵa joǵary deńgeide qyzmet kórsetý maqsatynda uiymdastyrylǵan sharaǵa oblys ákiminiń birinshi orynbasary Zulpyhar Joldasov, oblys turǵyndary men saiahatshylar qatysty,- dep habarlaidy Dalanews.kz
Týristik maýsymnyń ashylýynda kórermenderge erekshe shoýlar usynylyp, umytylmas áser syilady. «Jana lep» shyǵarmashylyq ujymy qazaqtyń ulttyq ánderin oryndap, kópshilikti súisindirdi. Sondai-aq zamanaýi áýender shyrqaldy. Týrister men túrkistandyqtardy tańǵaldyrǵan merekede tarihi tulǵalar men keiipkerler engizilgen kerýen júrip ótip, balalar ulttyq oiyndardy oinady. Ál-Farabi, Qoja Ahmet Iasaýi, Abai Qunanbaiuly syndy oishyldar jurtshylyqpen qaýyshty.
2,5 tonna naýryz kóje pisirildi
Týristik merekede 2,5 tonna naýryz kóje pisirilip, jurtshylyqqa usynyldy. Kóje 150 teńgeden satylyp, jinalǵan barlyq qarajat balalar úiine qaiyrymdylyq retinde beriledi. Qonaqtar men túrkistandyqtar naýryzkójemen aýyz ashyp, bir-birin merekemen quttyqtady. Siqyrshylar qoiylymy kórsetilip, baraban shoýy uiymdastyryldy. Tamaqty jyldam jeýden jarys jáne qolónershilerdiń shoýlary ótti. Ásem ánder shyrqalyp, bi bilendi.
2024 jyly Túrkistan oblysyna kelgen týrister sany 500 myńnan asty
Aita keteiik, aimaqqa keletin týristerdiń sany jyl saiyn artyp keledi. Túrkistan Qazaqstannyń jáne búkil túrki áleminiń eń iri týristik ortalyqtarynyń birine ainalýda. Ótken jyldyń qorytyndysy boiynsha Túrkistan oblysyna kelgen týrister sany 500 myńnan asty. Al birkúndik kelýshiler sany 1 millionǵa jýyqtady. Sondai-aq 2024 jyldyń III toqsanynda ornalastyrý oryndarynda demalǵan týrister sany 235 myń adamǵa jetip, ótken jyldyń tiisti kezeńimen salystyrǵanda 12%-ǵa ósti. Túrkistan qalasyna erekshe mártebe berý týraly Zańnyń qabyldanýy – óńir úshin tarihi oqiǵa. Bul bastama Túrkistannyń týrizm salasyndaǵy áleýetin odan ári nyǵaitýǵa jáne damytýǵa zor múmkindik beredi.
