Túrkistan mýzykalyq drama teatrynda IV maýsym ashyldy. Maýsym shymyldyǵyn Baidildá Aidarbektiń «Vals koroli» spektaklimen túrildi. Tórt kúnge josparlanǵan premera anshlagpen ótti. Jańa spektakldi tamashalaýǵa Túrkistan oblysynyń ákimi Darhan Satybaldy arnaiy qatysty, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Qoiylym aldynda teatr basshysy Álimhan Myrzahan Shámshi Qaldaiaqovtyń ómiri órnektelgen qoiylym týraly pikirin bildirip, kórermendi jańa maýsymmen quttyqtady. Teatrǵa kelýshiler Otyrar aýdanyndaǵy Shámshi mýzei-úiinen ákelingen án padishasynyń mýzykalyq aspaptarymen tanysty. Spektakl keiipkerlerin tolyǵymen Túrkistan mýzykalyq drama teatrynyń tól akterleri somdady. Teatrdyń jańadan qurylǵan mýzykalyq ansambli jandy daýysta súiemeldep, teatrdyń hor ujymy Shámshi Qaldaiaqovtyń úzdik ánderin oryndady.
Atalǵan teatr biyl sáýir aiynda Qazaqstan Jazýshylar odaǵymen birlese otyryp Qazaqstannyń halyq ártisi, kórnekti kompozitor Shámshi Qaldaiaqovtyń ómiri men shyǵarmashylyǵyna arnalǵan respýblikalyq dramatýrgiia baiqaýyn jariialaǵan edi. Báigege túsken shyǵarmalar ishinen Baidildá Aidarbektiń «Án-ǵumyr» atty pesasy júldeli boldy. Teatrdyń kórkemdik jetekshisi ári ideia avtory Shynar Omarova aldyn ala ótkizilgen baspasóz jiynynda halyq qoiǵan mártebesin ulyqtaý maqsatynda avtordyń kelisimimen qoiylym ataýy «Vals koroli» bolyp ózgertilgenin, basty maqsaty da qazaqtyń án padishasyn álemge tanytý ekenin atap ótti.
Spektakldi qoiýǵa halyqaralyq deńgeidegi kóptegen tájiribeli mamandar atsalysqan. Qoiýshy rejisseri – Karlo Shakallýga «Vals koroli» atanǵan dańqty kompozitor Shámshi Qaldaiaqovtyń bai shyǵarmashylyǵy men áýelegen ánmen órilgen taǵdyrynan syr shertetin qoiylymdy sahnalaý, qazaq án ónerimen tanysý qyzyq ári jańa deńgei bolǵanyn jasyrmady.
Basty rólderde – Daniias Nurqabden, Qadyrjan Tórehanov, Ali Marat, Sultan Meiirbek, Aiia Dáribaeva, Aida Serikova, Temirlan Erkinǵaliev, Sembai Nurla, Muzafar Ǵalymjanuly, Dinmuhammed Alpysbek, Aq-Sultan Ánýarbek, Merei Qudaibergen, Sherhan Samatuly, Ulan Ádilbek, Shuǵyla Jánibekova, Bolatbek Ospan, Aqbópe Sabet, Inabat Abythan, Aidana Aqqali, Dosymjan Arqabekov, Meiirjan Tursynov jáne taǵy basqa.
Qoiylymnyń stsenografiiasyn qoiǵan – Italiianyń «Architizer Prize and A.I.A Middle East» marapattarynyń jeńimpazy «Gio Forma» stýdiiasy,jaryq jónindegi sýretshisi – Gaetano La Mela. Qoiýshy horeograf – teatrdyń talantty bas baletmeisteri Madina Muratpekova. Mýzykany óńdegen – Qazaqstannyń eńbek sińirgen qairatkeri Erbol Muhamediev. Elimizdiń beldi teatrlarynda qyzmet atqarǵan tájiribeli maman, kostiým jónindegi sýretshi – Alma Syrbaeva. Hormeister – Uljan Bolathanqyzy. Mýzykalyq redaktory – Aqbala Ybyraiqyzy.
Qoiylym óte joǵary deńgeide boldy. Kompozitordyń sezimge toly shabytty shaqtary, ómirdegi jan kúizelisi men Otanǵa degen sheksiz mahabbaty sheber sýrettelgen. Túrkistandyq óner ujymy Shámshiniń Jumeken Nájimedenov, Muhtar Shahanov, Muzafar Álimbaev syndy tanymal aqyndarmen shyǵarmashylyq bailanysy kórermen júregine jetkize bildi. Shámshiniń bozbala, jigit, el aǵasy kezin somdaǵan úsh ártis te jurtshylyqty tánti etti.
Qoiylym sońynda oblys ákimi Darhan Satybaldy teatr ujymyna yqylas gúlin syilap, sahna tórinde shyǵarmashylyq toppen arnaiy kezdesti. Jas teatr ujymynyń ónerine joǵary baǵasyn berip, qoldaý kórsetti.
Osylaisha, Túrkistan mýzykalyq drama teatry qazaq rýhaniatyna tórt aiaǵyn teń basqan ǵajap týyndyny tartý etti. Shámshiniń án álemi máńgi toqtamaidy.
