Búgin kieli Túrkistan qalasynda «Ónerli ólke» oblystyq óner festivali aiasynda Arys qalasynyń mádeni kúnderi túńligin túrdi. Eki kúnge sozylatyn baǵdarlama ulttyq qundylyqtarǵa toly.
Is-shara Etnoaýyl kesheninen bastaý aldy. Munda kelýshiler Arys qalasynyń qolóner sheberleriniń týyndylaryn tamashalady, dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Budan bólek, memlekettik qoldaýdyń arqasynda grant alyp, kásibin ashqan azamattar óz týyndylaryn usyndy. Ashyq aspan astyndaǵy kórmege Arys qalalyq mýzeii de qalanyń tereń tarihynan pash etetin jádigerlerdi usyndy. Al sýretshiler men músinshilerdiń týyndylary kelýshilerdi erekshe tánti etti.
Ári qarai Etnoaýyl aýmaǵynda arystyq ónerpazdar men Ardagerler keńesiniń uiymdastyrýymen bai salt-dástúrimizdi nasihattaityn keremet sharalar kórinis tapty. Munda aq jaýlyqty ájeler týlaq tartý, tekemet basý, «tórkindetý», «qalaý» sekildi ǵuryptardy nasihattap, Túrkistan jurty men kelgen qonaqtarǵa erekshe áser syilady.
Arystyń darhan halqy túrkistandyqtar men qala qonaqtaryna ulttyq taǵamnan dám usynyp, naǵyz qazaqy qonaqjailyq kórsetti. Al merekelik keshtiń kórigin qalalyq mádeniet úiiniń ónerpazdary men ardagerler ansambli qyzdyra tústi. Qazirgi tańda beleń alyp kele jatqan kóshe teatry da kóptiń qyzyǵýshylyǵyn týdyrdy.
Myń buralǵan arystyq bishiler men kúmis kómei ánshiler án-biden shashý shashyp, ónerpazdar sahnalyq qoiylymdar qoidy. Osylaisha, Arys qalasynyń Túrkistan qalasyndaǵy mádeni kúnderi ashyq dep jariialandy.
Arys qalalyq Mádeniet, tilderdi damytý, sport jáne dene shynyqtyrý bólimi 300-ge jýyq ónerpazdyń basyn qosyp, túrkistandyqtar men qala qonaqtaryna óz ónerlerin pash etip jatyr.
Aita keteiik, merekelik kontserttik baǵdarlamalar legi 15 tamyzǵa deiin jalǵasatyn bolady. Onyń aiasynda túrli merekelik is-sharalar ótedi dep josparlanǵan. Atap aitsaq, saǵat 11:00-13:00 aralyǵynda Etnoaýylda ulttyq sporttyq oiyndar uiymdastyrylsa, al saǵat 19:00-de «Kerýen sarai» kesheninde arystyq ónerpazdarynyń qatysýymen gala-kontsert ótedi.
