QR Táýelsizdiginiń 30 jyldyǵyna oraı, Túrkistan oblysy aýmaǵyndaǵy orman qory jerlerine 30 mıllıonnan astam  kóshet otyrǵyzylýda. Onyń qazirgi tańda 21 mln danasy egilgen. Bul týraly brıfıńte 10 aıda atqarǵan jumystaryn qorytyndylaǵan oblystyq tabıǵı resýrstar jáne tabıǵat paıdalanýdy retteý basqarmasynyń basshysy Qaırat Ábdýalıev málimdedi, – dep habarlaıdy Dalanews.kz.

Túrkistan oblysynda orman sharýashylyǵy mekemelerine 3 mln 116 myń gektar orman qory jerleri bekitilgen. Onyń ishinde ormanmen kómkerilgen alqaby 1 mln 487 myń gektar.

– Keshendi josparǵa sáıkes, aǵymdaǵy jyly ormandy molaıtý sharalary boıynsha 1 000 gektar jerge mádenı orman ekpelerin egý jáne 10 600 gektar jerge sekseýil tuqymyn sebý jumystary júrgizilýde. Qazirgi tańda orman sharýashylyǵy mekemeleriniń tuqymbaǵynda 27 mıllıonnan astam kóshet ósirilýde, aldaǵy jyly 30-35 mıllıonǵa jetkizý josparlanǵan, – dedi Qaırat Amangeldiuly.

Oblys ákiminiń bastamasymen Túrkistan qalasy Bas josparyna sáıkes, ekologıalyq ahýaldy jaqsartý maqsatynda qala aınalasynan Jasyl beldeý qurý josparlanyp, 2019-2020 jyldary 4 700 gektar jerge 3 mln 212 myń 920 dana kóshet egilgen. Al 2021 jyldyń 10 aıynda 3 300 gektar jerge 8 mln 915 myń 900 dana japyraqty aǵash kóshetteri otyrǵyzylǵan. Qazirgi kúnge Jasyl beldeýdiń jalpy alańy 13 220 gektarǵa jetse, osy jyldyń sońyna deıin 20 000 gektarǵa jetkizý josparlanǵan.