– Qazirgi tańda, oblysymyzda investitsiialyq jobalardy jáne kásipkerlikti júzege asyrý boiynsha qolaily jaǵdai jasalǵan. Klimaty aýyl sharýashylyǵyna yńǵaily aimaqta egin men mal sharýashylyǵyna basymdyq berilgen. Sońǵy 3 jylda baqsha ónimderi 1 mln. tonnaǵa artty. Respýblikadaǵy jylyjailardyń 90 paiyzy bizdiń aimaqqa tiesili. Maqtanyń 100 paiyzy Túrkistan óńirinde óndiriledi. Osy rette, ózderińizdi birlesken túrde investitsiialyq jobalardy júzege asyrýǵa shaqyramyn. Bizdiń oblysta jumys isteýge nietti ózbek kompaniialaryna barynsha qoldaý kórsetetinimizdi aitqym keledi, – dedi Janseiit Qanseiituly.
Sondai-aq, atalǵan forým sheńberinde qos eldiń birqatar óńirleri de memorandýmǵa qol qoidy. Túzilgen 13 qujatqa Túrkistan oblysynan basqa, Qaraǵandy, Shyǵys Qazaqstan, Qostanai óńirleriniń jáne Astana, Almaty, Shymkent qalalarynyń basshylyǵy qol qoidy.
Aita keteiik, ótken jyly Ózbekstan Respýblikasyndaǵy birqatar oblystarmen yntymaqtastyq týraly memorandým túzilgen bolatyn. Osy qujattar barysynda jyldan jylǵa eki oblystyń saýda-ekonomikalyq bailanysy jaqsaryp keledi. Jalpy eki el 27 jyl ishinde ózara birqatar kelisim jasasqan. Sonyń eń bastylary «Máńgilik dostyq» jáne «Strategiialyq seriktes» týraly sharttary. Osy qujattar negizinde búgingi kúni Qazaqstanda 800-den astam kásiporyn ózbek kapitalynyń qatysýymen jumysyn istep keledi.
