Túrkistan qalasynyń qysqa daiyndyǵy pysyqtaldy
Alǵashqy másele boiynsha qala ákimi Álipbek Óserbaev qaladaǵy barlyq áleýmettik nysandardaǵy jylý júieleriniń daiyndyǵy, ortalyq jylý qazandyǵynyń jylý berý maýsymyna ázirligi jóninde jan-jaqty talqyǵa saldy.
Sondai-aq, osy baǵytta jaýapty sala basshylaryna naqty tapsyrmalar berip, qys mezgilinde tehnikalyq aqaýlarǵa jol bermeýdi osy kúnnen pysyqtaýǵa shaqyrdy. Óz kezeginde atalmysh másele boiynsha baiandama jasaǵan qalalyq turǵyn úi-kommýnaldyq sharýashylyq bóliminiń basshysy A.Asanovqa jylý berý baǵytyndaǵy barlyq máselelerdi qatań baqylaýda ustaýdy tapsyrsa, oǵan qosa ákimdik janynan arnaiy komissiia quryp, shahardaǵy tiisti mekemeler men turǵyn úilerdiń qysqy maýsymǵa daiyndyǵyn qadaǵalaýdy usyndy.
Kún tártibindegi jańa ákimshilik iskerlik ortalyǵy jáne tarihi ortalyqtaǵy jer telimderin qaitarý týraly ekinshi másele boiynsha baiandama jasaǵan qala ákiminiń orynbasary T.Musaev Q.A.Iasaýi kesenesiniń qarsy aldyndaǵy turǵyn úilerdi baǵalaý jumystary jyl sońyna deiin qaita pysyqtalyp, 2019 jyly memlekettik qajettilikke orai qaitarý jóninde naqty sharalar júrgiziletindigin jetkizdi. Sonymen birge, josparǵa sai atalǵan kesene mańyndaǵy ózge de túgendelýi tiis jer telimderi men nysandardyń tizimi jasaqtalyp, ol boiynsha josparly sharalardyń jalǵasa beretindigin tilge tiek etti. Qala basshysy bul baǵytta atqarylyp jatqan jumystardyń alǵashqy kezeńin óz merziminde iske asyrý qajettigin jiti baqylaýda ustaityndyǵyn eskertip, jumys barysynda kemshilikterge boi aldyrmaýdy basa aitty. Sebebi, jerdi túgendeý iaǵni, memleket menshigine alynatyn jer telimderi men turǵyn úilerdiń artynda adam taǵdyry turǵandyǵyn sóz etken qala ákimi Á.Óserbaev jaýapty tulǵalarǵa árbir iskejaýapkershilikpen qaraýdy tapsyrdy.
