Túrkistan qalasynda QMDB ókildigi ashyldy
Búgin Túrkistan oblysynyń ortalyǵynda Qazaqstan musylmandary dini basqarmasynyń turaqty túrde jumys isteitin ókildigi ashyldy.
Ashylý saltanatyna Qazaqstan musylmandary dini basqarmasynyń tóraǵasy, Bas múfti Serikbai Oraz, QR Qoǵamdyq damý vitse-ministri Aryn Berik jáne oblys ákimi Janseiit Túimebaev pen oblys ardagerleri men ziialy qaýym ókilderi, meshit imamdary qatysty.
Túrkistan qalasynda Qazaqstan musylmandary dini basqarmasy ókildiginiń ashylýy rýhani qalanyń ómirinde airyqsha sipatqa ie ekenin aitqan oblys ákimi bul ónegeli isterdiń uiytqysyna ainalar igi bastama bolǵaly turǵanyn jetkizdi.
– Qasietti Islam dinin qadir tutyp, ómiriniń basty maqsatyna ainaldyrǵan óńirimizdiń árbir musylmany úshin qýanyshty osynaý jańalyqpen sizderdi quttyqtaimyn. Qazaqstan musylmandary dini basqarmasynyń qasietti de kieli Túrkistanda turaqty jumys jasaityn ókildiginiń ashylýy Islam dininiń órkendep ósýine, dińgeginiń nyǵaia túsýine oń yqpalyn tigizetinine bizdiń senimimiz mol, – dedi J.Túimebaev.
Sharada sóz alǵan Qazaqstan musylmandary dini basqarmasynyń tóraǵasy, Bas múfti, Serikbai qajy Oraz tarihi oqiǵa – Túrkistan oblysynyń dúniege kelýimen barsha túrkistandyqtardy quttyqtap, ashylyp otyrǵan basqarmanyń ókildigi Islam dininiń órkendeýi jolynda jumys atqaratynyn aitty.
– Qasterleitin kieli oryn Qoja Ahmet Iassaýi babamyz jáne osy halqymyzdyń eń ardaqtylary, ulylary men jaqsylary meken tepken Túrkistanda búgin taǵy da erekshe sát. Elbasymyzdyń Túrkistandy oblys ortalyǵy retinde jáne rýhani hám mádeni ortalyq retindegi damý igi bastamalaryn qoldai otyryp, Qazaqstan musylmandary dini basqarmasy tóralqa jáne ǵulamalar keńesiniń bir aýyz sheshimimen men ózimniń birinshi orynbasarym, Astanadaǵy Áziret Sultan meshitiniń bas imamy bolyp qyzmet etip kelgen Naýryzbai qajy Taǵanulyn ákelip sizderdiń aldaryńyzda aitaiyn, tanystyraiyn dep otyrmyn. Óte tájiribeli, bilimdi, osy bizdiń Orta Aziianyń, qazaq musylmandyq mektebiniń qalyptasqan jetik túleginiń biri. Sol úshin Túrkistan qalasynyń taǵy da rýhani, mádeni jáne dini ortalyq retinde damýy úshin osy bizdiń tarihi sheshimimiz de taǵy da onyń salmaǵy men mańyzyn arttyra túsedi dep oilaimyn, – dedi Serikbai qajy Oraz.
Sonymen Túrkistan qalasyndaǵy Qazaqstan musylmandary dini basqarmasy ókili bolyp Astanadaǵy Áziret Sultan meshitiniń bas imamy Naýryzbai qajy Taǵanuly taǵaiyndaldy.
Túrkistan oblysy ákiminiń baspasóz qyzmeti
