Túrkistan oblysynyń ortalyǵyna QR Prezidentiniń keńesshisi Zúlfiia Súleimenova arnaiy jumys saparymen kelip, Qoja Ahmet Iasaýi atyndaǵy Halyqaralyq qazaq-túrik ýniversitetinde boldy. Oblys ákiminiń orynbasary Ertai Altaev Zúlfiia Súleimenovany qarsy alyp, óńirdegi ekologiialyq bastamalar men ǵylymi jobalarǵa qoldaý bildiretinin jetkizdi, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Aldymen Prezident keńesshisi ýniversitet janyndaǵy Botanikalyq baqty aralap, ǵylymi qurylym jetekshileri men baq qyzmetkerlerimen pikir almasty. Ýniversitettiń rektor ókili mindetin atqarýshy Naji Gench atqarylyp jatqan jumystardy baiandady.
Botanikalyq baqtyń jer kólemi 88 gektar aýmaqty quraidy. Munda 127-den astam ósimdik túri baptalady. Sondai-aq, óńir klimatyna beiimdelgen kollektsiia qalyptasqan. Sirek kezdesetin aǵash-butalar men dárilik ósimdikterdiń biologiialyq erekshelikteri zerttelip, introdýktsiialyq jáne ekologiialyq baǵytta ǵylymi izdenister júrgiziledi.
Sapar barysynda Prezident keńesshisi men oblys ákiminiń orynbasary baqqa kóshet otyrǵyzyp, estelik taqtaisha ornatty.
Zúlfiia Súleimenova ýniversitettiń ǵylymi áleýetimen tanysyp, ǵalymdarmen kezdesý ótkizdi. Májiliste ekologiia, biologiialyq resýrstardy saqtaý, ǵylymi zertteýlerdiń qoǵamǵa áseri, jastardy ǵylymǵa tartý joldary týraly pikir almasty.
– Prezidentimiz Ulttyq quryltaidyń 4-otyrysynda biologiialyq resýrstardy saqtaý máselesine asa mán bergen bolatyn. Tipti, halyqaralyq bioártúrlilikti saqtaý qoryn qurýdy da usyndy. Qazir biz osy bastamany uiymdastyrý jumystarymen ainalysýdamyz. Osy maqsatta elimizdegi botanikalyq baqtardy aralap, jumystarymen tanystym.
Búgin Túrkistan oblysyna kelýdegi basty maqsatym – Qoja Ahmet Iasaýi ýniversitetiniń Botanikalyq baǵynyń jumysymen tanysý, ǵylymi jobalar týraly aqparat alý, sondai-aq, baqtyń oqý úderisimen bailanysyn bilý edi. «Ýniversitette «Ǵylymi biologiia» mamandyǵy oqytylady eken, bul – óte qýantarlyq jaǵdai. Jastardy ǵylym jolyna tartý úshin dál osyndai baǵyttardy damytý qajet, – dedi Zúlfiia Súleimenova.
Onyń aitýynsha, qazir respýblikalyq deńgeide 6 botanikalyq baq bar. Al Ahmet Iasaýi ýniversitetiniń Botanikalyq baǵy – óńirlik deńgeide yqpaly joǵary ári ýniversitet janynan ashylǵan jalǵyz baq. Aýmaǵy aýqymdy, áleýeti de zor. Prezident keńesshisi bul tájiribeni basqa joǵary oqý oryndaryna engizý múmkindigin qarastyrý kerektigin atap ótti.
Kezdesý sońynda QR Prezidentiniń keńesshisi Botanikalyq baqtyń ǵylymi jáne ekologiialyq mańyzyn joǵary baǵalap, ýniversitet ujymynyń jumystaryn oń baǵalady.
