Túrkistan oblysy ákiminiń orynbasary Nurbol Turashbekov bastaǵan delegatsiia Sian qalasyndaǵy Bas konsýldyqtyń qoldaýy jáne uiymdastyrýymen Qytai Halyq Respýblikasyna jumys saparymen bardy, - dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Túrkistan oblysy ákimi Nuralhan Kósherovtiń tapsyrmasymen óńirge investitsiia tartý, ónerkásip oryndaryn ashý, jańa jumys oryndaryn qurý baǵytyndaǵy jumystar jalǵasyp jatyr.
Osy maqsatta oblys ákiminiń orynbasary Nurbol Turashbekov bastaǵan delegatsiia Sian qalasyndaǵy Bas konsýldyqtyń qoldaýy jáne uiymdastyrýymen Qytai Halyq Respýblikasyna jumys saparymen bardy. Jumys saparynyń alǵashqy kúni óńir delegatsiiasy Shensi provintsiiasynyń vitse-gýbernatory Chen Chýntszianmen kezdesti.
Kezdesý barysynda taraptar Túrkistan oblysy men Shensi provintsiiasy arasyndaǵy saýda-ekonomikalyq bailanystardy damytý jáne óńiraralyq yntymaqtastyqty odan ári nyǵaitý máselelerin talqylady. Aita keteiik, ótken jyly qos óńir arasynda baýyrlastyq týraly memorandýmǵa qol qoiylǵan bolatyn.
Shensi provintsiiasy – Qytaidyń jetekshi ekonomikalyq ortalyqtarynyń biri jáne ónerkásip, aýyl sharýashylyǵy, saýda men infraqurylymdyq damý salalarynda úlken áleýetke ie. Osyǵan bailanysty taraptar birlesken investitsiialyq jobalardy júzege asyrý, innovatsiialarmen almasý jáne saýda kólemin ulǵaitý baǵytynda tyǵyz qarym-qatynasty jalǵastyrýǵa múddeli ekenderin bildirdi.
Kezdesý qorytyndysy boiynsha taraptar eki óńir arasyndaǵy strategiialyq seriktestikti nyǵaitý úshin ózara is-qimyldy jandandyrýǵa ýaǵdalasty.
Sonymen qatar Túrkistan oblysy ákiminiń orynbasary Nurbol Turashbekov issapar jospary aiasynda sý resýrstaryn tiimdi paidalaný jáne sýmen jabdyqtaý júielerin damytý baǵytynda mamandanǵan «Shaanxi Water Development Group Co. LTD» kompaniiasynyń basshylyǵymen kelissózder júrgizdi.
«Shaanxi Water Development» kompaniiasy sý sharýashylyǵy infraqurylymyn salý, aýyzsý júielerin jobalaý, káriz júielerin jańǵyrtý, sýdy tazartý tehnologiialaryn jetildirý jáne osy salaǵa qatysty ónimder óndirýmen ainalysady. Kompaniia quramynda 19 mamandandyrylǵan kásiporyn bar. 2024 jylǵy málimetterge sáikes, kompaniia aktivteri 150 mlrd iýandy (shamamen 21 mlrd AQSh dollaryn) quraidy. Búginde kompaniia mamandary 15 elde iri jobalardy sátti júzege asyrýda.
Kezdesý barysynda qytailyq kompaniia ókilderi sýdy tazartý jáne lastanǵan sýdy qaita óńdeý, halyqty úzdiksiz aýyz sýmen qamtamasyz etý, sý sapasynyń qaýipsizdigin baqylaý salasyndaǵy ozyq tájiribelerimen bólisti. Sondai-aq aýyz sýdyń qoljetimdiligin arttyrýǵa baǵyttalǵan jańa tehnologiialardy qoldaný boiynsha birlesken jobalarǵa qatysý usynyldy.
Taraptar sý resýrstaryn tiimdi paidalaný, jańa tehnologiialardy engizý jáne investitsiialyq yntymaqtastyq máselelerin talqylap, osy baǵytta tyǵyz jumys isteýge nietti ekenderin bildirdi.
