تۇركىستان وبلىسى اكىمىنىڭ ورىنباسارى نۇربول تۇراشبەكوۆ باستاعان دەلەگاسيا سيان قالاسىنداعى باس كونسۋلدىقتىڭ قولداۋى جانە ۇيىمداستىرۋىمەن جۇڭگو حالىق رەسپۋبليكاسىنا جۇمىس ساپارىمەن باردى، - دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
تۇركىستان وبلىسى اكىمى نۇرالحان كوشەروۆتىڭ تاپسىرماسىمەن وڭىرگە ينۆەستيسيا تارتۋ، ونەركاسىپ ورىندارىن اشۋ، جاڭا جۇمىس ورىندارىن قۇرۋ باعىتىنداعى جۇمىستار جالعاسىپ جاتىر.
وسى ماقساتتا وبلىس اكىمىنىڭ ورىنباسارى نۇربول تۇراشبەكوۆ باستاعان دەلەگاسيا سيان قالاسىنداعى باس كونسۋلدىقتىڭ قولداۋى جانە ۇيىمداستىرۋىمەن جۇڭگو حالىق رەسپۋبليكاسىنا جۇمىس ساپارىمەن باردى. جۇمىس ساپارىنىڭ العاشقى كۇنى ءوڭىر دەلەگاسياسى شەنسي پروۆينسياسىنىڭ ۆيسە-گۋبەرناتورى چەن چۋنسزيانمەن كەزدەستى.
كەزدەسۋ بارىسىندا تاراپتار تۇركىستان وبلىسى مەن شەنسي پروۆينسياسى اراسىنداعى ساۋدا-ەكونوميكالىق بايلانىستاردى دامىتۋ جانە ءوڭىرارالىق ىنتىماقتاستىقتى ودان ءارى نىعايتۋ ماسەلەلەرىن تالقىلادى. ايتا كەتەيىك، وتكەن جىلى قوس ءوڭىر اراسىندا باۋىرلاستىق تۋرالى مەموراندۋمعا قول قويىلعان بولاتىن.
شەنسي پروۆينسياسى – قىتايدىڭ جەتەكشى ەكونوميكالىق ورتالىقتارىنىڭ ءبىرى جانە ونەركاسىپ، اۋىل شارۋاشىلىعى، ساۋدا مەن ينفراقۇرىلىمدىق دامۋ سالالارىندا ۇلكەن الەۋەتكە يە. وسىعان بايلانىستى تاراپتار بىرلەسكەن ينۆەستيسيالىق جوبالاردى جۇزەگە اسىرۋ، يننوۆاسيالارمەن الماسۋ جانە ساۋدا كولەمىن ۇلعايتۋ باعىتىندا تىعىز قارىم-قاتىناستى جالعاستىرۋعا مۇددەلى ەكەندەرىن ءبىلدىردى.
كەزدەسۋ قورىتىندىسى بويىنشا تاراپتار ەكى ءوڭىر اراسىنداعى ستراتەگيالىق سەرىكتەستىكتى نىعايتۋ ءۇشىن ءوزارا ءىس-قيمىلدى جانداندىرۋعا ۋاعدالاستى.
سونىمەن قاتار تۇركىستان وبلىسى اكىمىنىڭ ورىنباسارى نۇربول تۇراشبەكوۆ ءىسساپار جوسپارى اياسىندا سۋ رەسۋرستارىن ءتيىمدى پايدالانۋ جانە سۋمەن جابدىقتاۋ جۇيەلەرىن دامىتۋ باعىتىندا ماماندانعان «Shaanxi Water Development Group Co. LTD» كومپانياسىنىڭ باسشىلىعىمەن كەلىسسوزدەر جۇرگىزدى.
«Shaanxi Water Development» كومپانياسى سۋ شارۋاشىلىعى ينفراقۇرىلىمىن سالۋ، اۋىزسۋ جۇيەلەرىن جوبالاۋ، كارىز جۇيەلەرىن جاڭعىرتۋ، سۋدى تازارتۋ تەحنولوگيالارىن جەتىلدىرۋ جانە وسى سالاعا قاتىستى ونىمدەر وندىرۋمەن اينالىسادى. كومپانيا قۇرامىندا 19 مامانداندىرىلعان كاسىپورىن بار. 2024 جىلعى مالىمەتتەرگە سايكەس، كومپانيا اكتيۆتەرى 150 ملرد يۋاندى (شامامەن 21 ملرد اقش دوللارىن) قۇرايدى. بۇگىندە كومپانيا ماماندارى 15 ەلدە ءىرى جوبالاردى ءساتتى جۇزەگە اسىرۋدا.
كەزدەسۋ بارىسىندا قىتايلىق كومپانيا وكىلدەرى سۋدى تازارتۋ جانە لاستانعان سۋدى قايتا وڭدەۋ، حالىقتى ۇزدىكسىز اۋىز سۋمەن قامتاماسىز ەتۋ، سۋ ساپاسىنىڭ قاۋىپسىزدىگىن باقىلاۋ سالاسىنداعى وزىق تاجىريبەلەرىمەن ءبولىستى. سونداي-اق اۋىز سۋدىڭ قولجەتىمدىلىگىن ارتتىرۋعا باعىتتالعان جاڭا تەحنولوگيالاردى قولدانۋ بويىنشا بىرلەسكەن جوبالارعا قاتىسۋ ۇسىنىلدى.
تاراپتار سۋ رەسۋرستارىن ءتيىمدى پايدالانۋ، جاڭا تەحنولوگيالاردى ەنگىزۋ جانە ينۆەستيسيالىق ىنتىماقتاستىق ماسەلەلەرىن تالقىلاپ، وسى باعىتتا تىعىز جۇمىس ىستەۋگە نيەتتى ەكەندەرىن ءبىلدىردى.
