Elimizde jyl saiyn 1 qazan – Halyqaralyq qarttar kúni atalyp ótedi. Memleket basshysynyń tapsyrmasyna sáikes Túrkistan oblysynda da saltanatty is-sharalar ótip, qarttarǵa qurmet kórsetý dástúrge ainalǵan. Mereke kúni 1 qazan – Halyqaralyq Qarttar kúnine orai Túrkistan oblysy, Sairam aýdany, Qarasý aýylynda «Qurmet» ardagerler úii ashyldy. Qazynaly qariialardyń igiligine berilgen ǵimarattyń ashylý saltanatyna oblys ákimi Nuralhan Kósherov qatysyp, kópshilikti aitýly merekemen quttyqtady,- dep habarlaidy Dalanews.kz
– Úlkendi syilaý, olarǵa qurmet kórsetý – ata-babadan kele jatqan saltymyz. Memleket basshysy Qasym-Jomart Kemeluly óz sózinde: «Eń aldymen, halyqtyń bereke-birligin saqtaý asa mańyzdy. Bul iste elge sózi ótetin aǵa býynnyń orny bólek» degen bolatyn. Osy rette, sizder elimizdiń, oblysymyzdyń damýyna úles qosyp kelesizder. Al búgin Qarttar kúnine orai oblysymyzda airyqsha qýanyshty sátte kezdesip turmyz. Jańadan «Qurmet» ardagerler ortalyǵy el igiligine berilýde. Barshańyzdy ortalyqtyń ashylýymen shyn júrekten quttyqtaimyn! Ardagerlerimizdi ardaqtap, olardy qoldaý – bizdiń parasatty paryzymyz. Óńirde osy baǵytta júieli jumys júrýde, – degen Nuralhan Kósherov ardagerlerdiń eńbekterin joǵary baǵalap, qurmet kórsetti.
Qarttar kúnine orai merekelik dastarqan jaiylyp, ardagerler men zeinetkerlerge kontserttik baǵdarlama usynyldy. Marapattar tapsyryldy.
Ardagerler ortalyǵynyń jalpy aýmaǵy 5 myń sharshy metrden asady. Munda zeinetkerlerdiń bos ýaqytyn tiimdi ótkizýine barlyq jaǵdai jasalǵan. Ǵimarattyń aýlasy abattandyrylyp, arnaiy demalys alańshalary daiyndaldy. Baý-baqsha janynan terrenkýr ornatylyp, skandinaviialyq serýendeý joly qarastyryldy. Jańa ortalyq bir aýysymda 200 adamdy qabyldai alady.
Jalpy buǵan deiin oblys ardagerlerine Shymkent qalasynda 1976 jyly salynǵan eski ǵimarat qyzmet kórsetip kelgen. Sondyqtan «Ardagerler úiin» oblys aýmaǵyna kóshirý jáne zaman talabyna sai etý maqsatynda jańa ǵimarat tańdaldy.
Aita keteiik, qazirgi tańda Túrkistan oblysynda 200 myńnan asa zeinetker bar. Bul – oblys halqynyń 10 paiyzyna jýyq. Oblysta 100 jastan asqan 51 qariia turady. Óńirde ardagerlerdi qoldaý baǵytynda júieli jumys júrgizilýde. Biyl Uly Jeńistiń 80 jyldyǵy atap ótilip, maidangerlerge, tyl ardagerlerine qurmet kórsetildi. Qariialardyń ómir súrý sapasyn jaqsartý úshin óńirde 21 «Belsendi uzaq ómir súrý» ortalyǵy ashyldy. Ol mekemelerde 10 myńnan astam zeinetker tynyǵyp, ýaqyttaryn tiimdi ótkizýde. Jyl saiyn 8 myńǵa jýyq qariia oblystyq biýdjet esebinen demalys oryndarynda demalyp, densaýlyǵyn túzeidi.
Odan bólek Qarttar kúni merekesin ótkizý jóninde oblys boiynsha arnaiy «Qariialar – eldiń qazynasy» atty is-sharalar jospary bekitildi. Is-shara sport, bilim jáne densaýlyq salalaryn qamtidy. Osy arqyly aǵa býynǵa jan-jaqty qoldaý kórsetilip jatyr.
