Túrkistan oblysynda 2025 jylǵy josparǵa sáikes, eldi mekenderge 1 millionnan astam kóshet úlestirý kózdelgen. Búgingi tańda 206 375 túp kóshet aýdan-qala ákimdikterine jóneltilgen. Bul jaiynda Túrkistan oblysy tabiǵi resýrstar jáne tabiǵat paidalanýdy retteý basqarmasynyń basshysy Qairat Ábdýaliev brifingte málimdedi,- dep habarlaidy Dalanews.kz
«Oblystaǵy eldi mekenderdi kógaldandyrýǵa 2022 jyly – 251 685 túp, 2023 jyly – 1 088 944 túp, 2024 jyly – 997 329 túp ártúrli kóshetter aýdan-qalalarǵa jóneltilgen.Óńirde 3 mln 472 myń gektardy quraityn memlekettik orman qory bar. Memleket basshysynyń 2020 jylǵy 1 qyrkúiektegi «Jańa jaǵdaidaǵy Qazaqstan: is-qimyl kezeńi» atty Joldaýynda respýblika kóliminde 2 mlrd aǵash otyrǵyzýdy tapsyrǵan bolatyn. Atalǵan tapsyrmaǵa sáikes, oblystyń orman qory jerlerine 2021-2027 jyldary 110 myń gektarǵa 170 mln kóshet egý jumystary boiynsha arnaiy keshendi jospar bekitilgen. Bekitilgen keshendi josparǵa sáikes, 2021-2024 jyldary aralyǵynda 79 myń gektar jerge 117 mln túp kóshet egildi. Al, 2025-2027 jyldary aralyǵynda qalǵan 31 myń gektar jerge, 53 mln túp kóshet egý jumystary tolyǵymen júrgiziletin bolady. 2024 jyly orman sharýashylyǵy mekemelerinde jalpy kólemi 343 gektardy quraityn 24 orman tuqymbaǵynda 30 millionǵa jýyq kóshet ósirilip, 10 mln astam kóshet egildi», - dedi basqarma basshysy.
Odan bólek, basqarma basshysy oblystaǵy balyq sharýashylyǵyna qatysty atqarylyp jatqan jumystar týraly baiandady. Búginde oblysta taýarly balyq ósirýmen ainalysatyn sharýashylyqtardyń sany 231-ge jetip, onyń 160-y oblysaralyq basseiindik balyq sharýashylyǵy inspektsiiasymen zańdastyrylǵan. Baǵdarlamaǵa sáikes, 2024 jylǵa 7000 tonna balyq ósirý mejesi qoiylyp, jospar 7509 tonnaǵa oryndalǵan.
