Túrkistan oblysynda týberkýlez aýrýshańdyǵy tómendegen. Bul týraly brıfıńte Túrkistan oblysynyń sanıtarıalyq-epıdemıologıalyq baqylaý departamentiniń basshysy Nurbek Nyshanov málimdedi,- dep habarlaıdy Dalanews.kz
«Oblys boıynsha turǵyndar arasynda 2025 jyldyń 2 aıynda týberkýlezben 102 jaǵdaı tirkelip, ótken jyldyń osy kezeńimen salystyrǵanda 16,8 paıyzǵa tómendegen. Al, 14 jasqa deıingi balalar men jasóspirimder arasynda 4 jaǵdaı tirkelgen. Alaıda óńirde syrqattyń asqynǵan túri tirkelmegen. Sonymen qatar, bıyl flúorografıalyq tekserýge 7 549 adam josparlanyp, týberkýlez aýrýymen 8 naýqas anyqtalǵan. Qazirgi tańda 24 aqpan - 24 naýryz kúnderi aralyǵynda Dúnıejúzilik týberkýlezge qarsy kúres boıynsha tıisti jumystar júrgizilip jatyr. Osy rette, Departamenttiń uıymdastyrýymen týberkýlez aýrýynyń aldyn alý boıynsha qoldanystaǵy normatıvtik aktilerge sáıkes epıdemıologıalyq is-sharalar qatań baqylaýǵa alynyp, turǵyndar arasynda sanıtarlyq aǵartý jumystary keń kólemde nasıhattalýda»,- dedi spıker.
Nurbek Nyshanovtyń sózinshe, Túrkistan oblysynda indetke qarsy is-sharalar qarqyndy túrde uıymdastyrylýda. Sonymen qatar, emdeý profılaktıkalyq uıymdarynyń medısına qyzmetkerleri arasynda týberkýlez aýrýynyń aldyn alý maqsatynda naýqasty erte anyqtaý, dıagnostıkalaý, emdeý boıynsha semınar, jattyǵý sabaqtary júrgizilip jatyr.
