Túrkistan oblysynyń ákimi Nuralhan Kósherov Shardara aýdanyna kezekti ret jumys saparymen baryp, aýyz sýmen qamtý baǵytyndaǵy jumystardy qadaǵalady. Shardara qalasynyń bas sý torabynda mamandarmen keńesip, tiisti tapsyrmalar berdi. Odan keiin jańa uńǵyma qazý, sý tapshylyǵynyń aldyn alý jumystaryn kórdi,- dep habarlaidy Dalanews.kz
04.08.2025 jylǵy málimet boiynsha «Shardara» sý qoimasyndaǵy sýdyń kólemi 401 mln. tekshe metrdi qurady (kiris-144 m3/sek, shyǵys-331 m3/sek.). Shardara qalasynda 31 883 turǵyn, 6520 abonent, 85 kópqabatty (1687 páter) jáne 4 833 jeke turǵyn úi bar. Jalpy sý tasymaldaýdy 85 kópqabatty úi (6 748 adam) jáne 64 jeke úi (332 adam) qajet etedi.
«Shardara» sý qoimasynda sý kóleminiń azaiýyna bailanysty oblys ákiminiń tapsyrmasymen qalany jedel aýyz sýmen qamtamasyz etýdiń is-qimyl algoritmi bekitilgen. Algoritmge sáikes aýyz sý táýekelderin basqarý boiynsha shtab quryldy.
Kópqabatty turǵyn úiler ornalasqan «Abai», «Qyzyljar», IV jáne «Asem-ai» yqsham aýdandaryna 28 dana (2-tonna) sý jinaý ydysy ornatylyp, sý toltyryldy. Bul ydystardy turaqty aýyz sýmen toltyrý úshin 10 arnaiy sý tasymaldaityn kólik jumyldyryldy. Sý kózi retinde «Óteǵul» shaǵynaýdanynyń bas sý torabyndaǵy uńǵyma paidalanyldy. Jekemenshik 3 uńǵyma jáne sý tasymaldaityn 15 kólik ielerine sý baǵasyn kótermeý túsindirilip, kelisim túzildi. Qudyǵy bar úilerge sý tasymaldaý jumystary júrgizilýde.
Taǵy bir aita keterligi, qalanyń bas sý torabyn balamaly sý kózimen toltyrý úshin uńǵyma burǵylaý jumystary bastalǵan. Qazirgi tańda birinshi uńǵymadan 84 metrde sý shyǵyp, tik qubyr salyndy, sýdyń kózin ashý jumystary júrip jatyr. Ekinshi uńǵyma 30 metrge qazyldy, jumystar jalǵasyn tabady.
Sý qoimada sý deńgeiiniń shamadan tys tómendep, bas sý torabynyń I kóterilimindegi sorǵyǵa qajetti sý kólemi jetispeýshiligine bailanysty 630 tekshe metr sý berýge arnalǵan panton ústindegi nasosty qosý sharalary qolǵa alyndy. Oǵan óńir basshysy, aýdan ákimi, jergilikti azamattar birlese atsalysty.
Aýyz sý máselesine qatysty jaýaptylar bekitilgen, jaǵdai turaqty ári baqylaýda.
