Elimizde sońǵy jyldary Soltústikke kósh júieli túrde uiymdastyrylyp keledi. Biyl respýblika boiynsha 7050 kvota bólinip, qandastar men qonys aýdarýshylar úshin memlekettik qoldaý kórsetetin 7 oblys belgilendi. Sonyń ishinde biylǵy 9 aida Túrkistan óńirinen 300-dei otbasy, iaǵni 1200-ge jýyq jan qonys aýdarǵan, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Búgin Soltústik Qazaqstan oblysynan arnaiy kelgen ókildermen oblys ákiminiń orynbasary Beisenbai Tájibaev kezdesti. Jiyn barysynda kóshi-qon máselesi men arnaiy beiimdelý ortalyǵyn ashý jaiy jan-jaqty talqylandy.
– Búginde memleket tarapynan eńbek kúshi artyq óńirlerden tapshy óńirlerge qonys aýdarý protsesi júrip jatyr. Ózderińiz bilesizder, bizdiń óńirde 2 million 200 myńǵa jýyq turǵyn bar, iaǵni halyq sany tyǵyz ornalasqan. Demografiialyq ósim de joǵary. Oblys basshysy Darhan Amangeldiuly óńirdiń negizi problemalarynyń biri bolǵan jumyssyzdyq deńdeiin azaitý jáne turǵyndardyń áleýmettik jaǵdaiyn kóterýdiń barlyq múmkin bolǵan baǵyttaryn qaraýdy tapsyrǵan bolatyn.
Atalǵan kósh jumyssyzdyqty ońtailandyrýdyń negizgi baǵdarlamalarynyń biri deýge bolady. Soltústik Qazaqstan oblysynda da ózge 6 oblyspen qatar qonys aýdarýshylardy qabyldaý boiynsha is-sharalar iske asyrylýda. Ol jaqqa kóship barýshylarǵa biraz ýaqytqa deiin jan-jaqty qoldaý qajet. Sizder usynyp otyrǵan beiimdeý ortalyǵy utymdy sheshim bolmaq. Bul bastamany kásipkerler men demeýshilerdiń tikelei qoldaýymen júzege asyrýǵa bolady dep oilaimyn. Bul másele kún tártibinen túspeý kerek, – dedi oblys ákiminiń orynbasary.
Soltústik Qazaqstan oblysy, Petropavl qalasynyń Qandastar men qonys aýdarýshylarǵa arnalǵan aqparattyq-túsindirý ortalyǵynyń jetekshisi Ánýar Toqpan osy baǵytta soltústik óńirdegi atqarylyp jatqan jumystarmen tanystyrdy. Onyń aitýynsha alǵash ret ońtústik aimaqtardan turǵyndardy kóshirý jobasy 2015 jyly bastalǵan. Alaida pandemiia jyldary úzilip, byltyrdan bastap qaita qolǵa alynǵan. Táýelsizdik alǵan jyldary 1 millionǵa jýyq bolǵan óńirde búginde 530 myń ǵana turǵyn bar. Soltústik Qazaqstan oblysyna jyl basynan beri el aýmaǵynan 412 otbasy, iaǵni 1200-den astam adam qonys aýdaryp, 70 otbasy 125 qandastardy qabyldaǵan.
«Táýekel» qoǵamdyq birlestiginiń tóraǵasy Býrahan Daqanov aldymen qýanyshty jańalyq jetkizdi. Taiaýda ótken ulttyq mereke qarsańynda atalǵan oblysta 5 ana «Altyn alqa» alsa, onyń 3-ýi Túrkistan oblysynan kóship barǵandar eken. Qonys aýdarýshylar úshin memleket otbasynyń árbir múshesine 258 440 teńge mólsherinde materialdyk kómek kórsetedi, degenmen kóshi-qon máselesin ońtailandyrý úshin bul somany kóbeitý qajet dep sanaimyn deidi uiym jetekshisi. Sonymen qatar, turǵyn úidi jaldaý men kommýnaldyq qyzmet shyǵyndaryn óteýge járdem beriledi. Odan bólek, bilim alýǵa, kásipkerlikti damytýǵa jáne jumysqa ornalasýǵa kómek kórsetiledi. Al byltyrdan bastap kóship barǵan azamattarǵa turǵyn úi satyp alý nemese salý úshin onyń qunynyń 50 paiyzyn berý kózdelipti.
Atalǵan uiym jetekshileri oblystyń aýdan, qalalarynda kezdesý ótkiziledi. Buǵan deiin Sairam men Ordabasy aýdanynda jáne Túrkistan qalasynda ótken kezdesý Arys qalasynda, Shardara men Maqtaaral, Jetisai men Keles, Saryaǵash pen Qazyǵurt aýdanynda jalǵasady. Onda jumys izdep soltústikke kóshkisi kelgen turǵyndar kókeidegi saýaldaryn qoiyp, «Mansap» ortalyqtarynda jan-jaqty maǵlumat ala alady.
Aita keteiik, biyl jyl basynan beri oblystyq jumyspen qamtýdy úilestirý jáne áleýmettik baǵdarlamar basqarmasymen eki ret Túrkistan oblysynan erikti qonys aýdarýshylarǵa arnalǵan «Qonys aýdarý» jármeńkeleri ótkizilip, oǵan Abai, Qaraǵandy, Pavlodar, Soltústik Qazaqstan, Ulytaý, Shyǵys Qazaqstan oblystarynyń ókilderi qatysty. Nátijesinde qońys aýdarýǵa qyzyǵýshylyq tanytyp, niet bildirgender qatary kóbeiýde.
