QR Aýyl sharýashylyǵy ministri Aidarbek Saparov jumys saparymen Túrkistan oblysyna baryp, shegirtkelerge qarsy himiialyq óńdeý jumystary barysyn tekserdi, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Eske salaiyq, 270 myń gektar alqapta júrgizilgen óńdeýlerden keiin óńirde 60 myń gektardan astam alqapta jańa taralý aýmaǵy anyqtaldy.
Qazirgi ýaqytta Arys, Saryaǵash, Keles, Ordabasy jáne Shardara aýdandarynda qosymsha óńdeý jumystary júrgizilýde. 55 myń gektardaǵy jumystar aiaqtaldy. Kókónis-baqsha daqyldary alqaptary mańyndaǵy shegirtke úiirlerin joiýǵa 73 jer ústi tehnikasy men 4 ushaq jumyldyryldy. Qabyldanǵan sharalardyń arqasynda búgingi tańda egistiktiń zaqymdanýy tirkelgen joq. Aýyl sharýashylyǵy ministriniń tapsyrmasy boiynsha jumystardy baqylaý úshin aýyl sharýashylyǵy vitse-ministri Ermek Kenjehanuly men AÓK memlekettik inspektsiia komitetiniń tóraǵasy Darhan Ábdikárimov osy óńirde júr. Sondai-aq, jumys barysy vedomstvo basshylyǵynyń turaqty baqylaýynda.
Ziiankesterdiń taralý aýmaqtaryn taldaýdy QR AShM AÓK Memlekettik inspektsiia komitetiniń Ádistemelik ortalyǵy júzege asyrady. Nátijeni arttyrý úshin shegirtkeniń neǵurlym álsiz kezinde, iaǵni, qanat alar aldyn deiin boljamdy qaýip tóndiretin aimaqtarǵa óńdeý jumystary júrgiziledi. 2024 jyly shegirtke ziiankesterimen kúresýge 4,2 mlrd teńge, boljamdy óńdeý sharalaryn tolyǵymen júrgizýge QR Úkimetiniń rezervinen qosymsha 3,9 mlrd teńge bólindi.
Eske salaiyq, ministr sáýir aiynda Saryaǵash aýdanyndaǵy himiialyq óńdeý jumystarynyń sapasy men qarqynyna baqylaý júrgizip, merdigerlermen kóshpeli keńes ótkizip, jumys nátijesin qatań synǵa alǵan bolatyn.
Túrkistan oblysynda óńdeý jumystary 92 dana jer ústi jeldetkish búrikkishtermen jáne 6 birlik aýyl sharýashylyǵy aviatsiiasymen júzege asyryldy. Qazyǵurt aýdanyndaǵy jetýi qiyn jerlerdi óńdeý úshin alǵash ret drondar qoldanyldy.
Óńdeý jumystarynyń qarqynyn arttyrý úshin jerústi jáne ushaqtar sekildi qosymsha tehnikalardy tartý tapsyryldy.
Búgin ministr Arys, Saryaǵash, Keles, Shardara aýdandaryndaǵy sharýa qojalyqtarynyń aýmaǵynda jer ústi tehnikasyn paidalaný arqyly himiialyq óńdeý jumystarynyń barysymen tanysyp, mamandandyrylǵan tehnikanyń jai-kúiin tekserdi.
Fermerlermen kezdesý barysynda Aidarbek Saparov Premer-Ministrdiń tapsyrmasy boiynsha bul baǵytta qajetti qoldaý kórsetilip jatqanyn atap ótti.
– Jaǵdai ońai emes, biraq aýqymdy óńdeý boiynsha ýaqytyly qabyldanǵan sharalardyń arqasynda biz olardyń tiimdiligin kórip otyrmyz. Tehnika men preparattar jetkilikti, qosymsha eki ushaq bólý máselesi sheshilýde. Qajet bolǵan jaǵdaida jergilikti sharýashylyqtardyń tehnikasy qosymsha tartylatyn bolady. Eń bastysy, egistik alqaptary zardap shekpegen. Ministrlik ókilderi barlyq týyndaǵan máselelerdi jedel sheshý úshin jumys basynda qyzmet atqarýda, – dep atap ótti ministr.
Óz kezeginde sharýalar da ministrlik tarapynan jasalyp jatqan jumystarǵa alǵystaryn aityp, qoldaý qajet bolǵan jaǵdaida qol ushyn sozatyndaryn málimdedi.
– Óńdeý turaqty túrde júrgizilýde. Ózderińiz kórip otyrǵandai, baqsha daqyldary zardap shekken joq. Bizdiń sharýashylyqtar óz betinshe jumys istei almas edi. Fermerler úshin bul qoldaý óte mańyzdy, – dedi ministrge "Nurpeiis" ShQ basshysy Nurpeiis Mamytov.
