Tólebi aýdanyna qarasty Ekpindi aýylynda Qazaqstan halqy Assambleiasynyń 30 jyldyǵyna orai, qazaqtyń ulttyq oiyny kókpardan jarys ótti, dep habarlaidy Dalanews.kz
Eldi yntymaq-birlikke shaqyryp, salaýatty ómirdi nasihattaǵan sport dodasyna Shardara aýdanynyń týmasy, ulttyq sporttyń janashyry, jeke kásipker Viktor Derevianko uiytqy bolyp, demeýshilik etti. Jarystyń jalpy júlde qory 4,5 mln teńgeni qurady.
Túrkistan oblystyq qoǵamdyq damý basqarmasy «Qoǵamdyq kelisim» KMM-niń qoldaýymen uiymdastyrylǵan is-sharaǵa elimizdiń birqatar óńirleri men Germaniia, Resei, Qytaidan kelgen qonaqtar, sondai-aq oblystyń barlyq aýdan, qalalarynan atbegiler men shabandozdar jáne ardager sportshylar, aýyl aqsaqaldary, BAQ ókilderi, jergilikti turǵyndar qatysty. Kókparda as berilip, kiiz úiler tigilip, patriottyq ánder shyrqaldy.
Kókpardyń basty uiymdastyrýshysy Viktor Borisovich óz sózinde elimizdiń tutastyǵy men birligin, tatýlyǵy men tynyshtyǵyn ózimizdiń kún saiynǵy qajyrly eńbegimizben qoldap, qorǵap nyǵaita berý árbir qazaqstandyqtyń azamattyq mindeti ekenin atap ótti.
- Eldiń birligi men tynyshtyǵy – eń basty bailyq dep sanaimyn. Biyl qoǵamdaǵy dostyq pen birlikti nyǵaitýǵa jáne beibit ómirimizge ólsheýsiz úles qosyp otyrǵan Qazaqstan halqy Assambleiasynyń 30 jyldyǵy keń kólemde atap ótilip jatyr. Mereili jylǵa orai osy eldiń azamaty retinde óz úlesimdi qosaiyn degen nietpen kókpar saiysyn ótkizýdi maqsat ettim. Kókpar – qazaqtyń tól sporty ári rýhy myqty jigitterdiń oiyny. Pyraqtyń ústinde ósken azamat elshil, halyqshyl keledi dep oilaimyn. Sondyqtan da, bul ulttyq sportty nasihattaýdy aldaǵy ýaqytta da jalǵastyrmaq niettemin, - dedi ol.
Sport saiysynyń qorytyndysynda taqymyn qysyp, kókserkeni kótere bilgen úzdik shabandozdar qarjylai syilyqtarmen marapattaldy. Bul oraida, kelestik Ǵalymjan Myrzabaev pen qazyǵurttyq Báidibek Sabyrov úzdik bolyp, olarǵa 500 myń teńge syiaqy tabystaldy. Basqa da shabandozdarǵa qomaqty syilyqtar berildi.
Dúbirli doda sońynda qariialar jastarǵa bata berip, eldiń azamaty bolýǵa shaqyrdy, elimizdiń yrys-nesibesi molaiyp, halqymyzdyń bereke-birligi arta bersin dep izgi tilekterin jetkizdi.
