Túrkistan oblysy, Ordabasy aýdany, Temirlan aýylynda jańa mýzykalyq óner mektebiniń qurylysyn bastaý sheńberinde ýaqyt kapsýlasyn salý rásimi ótti,– dep habarlaıdy Dalanews.kz
İs-sharaǵa oblys ákimi Nuralhan Kósherov jáne Qazaqstan Bas prokýratýrasynyń Aktıvterdi qaıtarý komıtetiniń tóraǵasy Nurdáýlet Súıindikov, oblys prokýrory Murat Tileýberdıev, aýyldyń aqsaqaldary men qurmetti turǵyndary qatysty.
Atalǵan mekteptiń qurylysy – Memleket Basshysynyń tapsyrmasyna sáıkes qaıtarylǵan kapıtaldy halyq ıgiligi úshin tıimdi paıdalaný aıasynda Úkimetpen maquldanǵan alǵashqy áleýmettik jobalardyń biri.
Saltanatty rásim barysynda qatysýshylar jergilikti turǵyndardy qurylys jumystarynyń bastalýymen quttyqtap, bul mekteptiń iske qosylýy elde júrgizilip jatqan aktıvterdi qaıtarý jumystarynyń naqty nátıjesin halyq óz kózimen kórýge múmkindik beretinine senim bildirdi.
Jergilikti aqsaqaldyń batasynan keıin qatysýshylar bolashaq urpaqqa arnalǵan ýaqyt kapsýlasyn saldy.
Aıta keteıik, buǵan deıin aýylda 1974 jyly salynǵan, qazirgi tańda apatty jaǵdaıda turǵan mýzykalyq mektep jumys istep kelgen bolatyn.
Quny 890 mln teńge turatyn 300 oqýshyǵa arnalǵan jańa mektep kórshiles aýyldardyń oqýshylaryn da qabyldaıdy.
Búginge memleket paıdasyna jalpy somasy shamamen 610 mlrd teńge kóleminde aktıvter qaıtaryldy, onyń ishinde 506 mlrd teńge – aqshalaı qarajat, 103 mlrd teńge – múlik.
Memleket Basshysynyń tapsyrmasyna sáıkes, Úkimet arnaıy memlekettik qordan bilim berý, densaýlyq saqtaý, sport jáne komýnaldyq ınfraqurylymdy jańǵyrtý salalarynda 280 áleýmettik nysannyń qurylysyn qarjylandyrý úshin qarajat bóldi. Atalǵan jobalar eldi mekenderdi damytýǵa baǵyttalǵan keshendi tásildiń bir bóligi bolyp tabylady jáne ómir súrý úshin qolaıly jaǵdaılarǵa tikeleı áser etetin mańyzdy ınfraqurylymdy ilgeriletýge serpin berýge arnalǵan.
«Zańsyz ıemdelgen aktıvterdi memleketke qaıtarý týraly» Zańnyń maqsattary men mindetterin iske asyrý «Zań men Tártip» qaǵıdatyn tıimdi qamtamasyz etýmen ózara úılesetinin atap ótý qajet. Bul baǵyttaǵy jumystar jalǵasýda.
