Memleket basshysynyń 15 mln kóshet egý tapsyrmasyna sáikes, 2021-2025 jyldary Túrkistan oblysynda 1,1 mln kóshet otyrǵyzý josparlanǵan. Osyǵan orai, «Túrkistan oblysynyń eldi mekenderin kógaldandyrýdyń 2022-2024 jyldarǵa arnalǵan is-shara jospary» bekitilgen bolatyn, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Búginde atalǵan is-shara aiasynda óńirimizdegi 800-den astam eldi mekenniń shamamen 90 paiyzyn kógaldandyrý úshin 4 millionnan astam kóshet egý josparlanyp otyr.
Oblystyń eldi mekenderin kógaldandyrý josparyna sáikes, 2022-2024 jyldar aralyǵynda 1 mln 832 myń túp kóshet otyrǵyzyldy. Onyń ishinde, Túrkistan qalasyna 512 myń túp kóshet otyrǵyzýǵa berilgen bolatyn. Búgingi kúnge jospar 46 paiyzǵa oryndaldy.
Biyl kúzgi kóshet otyrǵyzý naýqany aýdan, qalalardyń aýa raiyna qarai qarasha aiynan bastalady dep kútilýde. Aýdan, qalalardyń suranystaryna sáikes, 516 myń túp kóshet otyrǵyzý josparlanýda. Kógaldandyrýǵa Túrkistan oblysynyń tabiǵi resýrstar jáne tabiǵat paidalanýdy retteý basqarmasyna qarasty orman sharýashylyǵy mekemeleriniń tuqymbaqtarynda ósirilip jatqan 26 túrli kóshet túri qoldanylmaq. Atalǵan kóshet túrleriniń barlyǵy oblystyń klimattyq jaǵdaiyna beiimdelgen.
Sonymen qatar oblys ákiminiń eldi mekenderge gúldi ósimdikterdi kóptep otyrǵyzý tapsyrmasyna sáikes, eldi mekenderge biyl 50 myń túp, 2025 jyly 150 myń túp raýshan gúlderi men qylqan japyraqty kóshetter egý josparlanyp otyr.
