Túrkistan oblysynda salynyp jatqan nysandardyń qurylys sapasy qatań baqylaýda tur. Ótken jyly jospardan tys 416 tekserý jumystary júrgizilip, tekserýler negizinde anyqtalǵan zań buzýshylyqtar boiynsha 950 hattama toltyryldy. Nátijesinde, 290 mln teńge aiyppul salynyp, onyń 262,7 mln teńgesi óndirildi. Bul týraly Túrkistan oblysynyń ákimi Nuralhan Kósherovtiń tóraǵalyǵymen ótken jiynda aityldy,- dep habarlaidy Dalanews.kz
Aimaq basshysy aýdan, qala ákimderi men tiisti sala basshylaryna zańsyz qurylystyń aldyn alý jumystaryn júieleýdi, monitoring jumystaryn kúsheitýdi tapsyrdy.
"Oblys aýmaǵynda nysandarǵa reidtik is-sharalar uiymdastyryp, jumystardy kúsheitińizder. Kóshe-kósheni aralap, zańsyz qurylystardy anyqtańyzdar. Naqty saraptama jasap, shara kórińizder. Jumys nátijesi anyq kórinip turý qajet. Túrkistannyń sáýleti men kelbetine asa muqiiat bolyńyzdar. Barlyq nysan dizain kodqa sai bolýy qajet. Jaýapty tulǵalarǵa baqylaý jumystaryn turaqty júrgizýdi tapsyramyn. Zańǵa baǵynbaityn merdigerlerdiń jumysyn toqtatyp, aiyppuldardy tolyq óndirińizder. Áleýmettik nysandardyń sapasyna asa jaýapkershilikpen qarańyzdar", – degen Nuralhan Oralbaiuly jumys nátijesin kórsetýge ýaqyt berdi.
Jiynda Túrkistan oblysynyń baqylaý jónindegi basqarmasynyń basshysy Aidos Ismailov 2024 jyly atqarylǵan jumys qorytyndysy týraly baiandap, aldaǵy jumys josparymen tanystyrdy. Onyń málimdeýinshe, oblys boiynsha ótken jyly 3020 nysannyń qurylys-montaj jumystary bastalǵan. Onyń ishinde, 986-sy – biýdjettik, 2034-i – jeke kásipkerlik esebinen. Basqarma men aýdan, qala ákimdikteri birlese oblys aýmaǵyndaǵy zańsyz salynǵan nysandardy anyqtaý boiynsha turaqty monitoring jumystaryn júrgizdi. Nátijesinde, biýdjet qarajaty esebinen salynǵan nysandarǵa 173,4 mln teńge jáne jeke qarajat esebinen salynǵan nysandarǵa 116,6 mln teńge aiyppul salynǵan.
Oblystaǵy jol qurylysy men injenerlik infraqurylym jelileri qurylystarynyń sapasyna júrgizilgen baqylaý nátijesinde jol qurylysy boiynsha 23 nysanǵa, gaz júieleri qurylysynda 27 nysanǵa, aýyz sý júieleri qurylysynda 9 nysanǵa, elektr jelileri qurylysynda 8 nysanǵa aiyppul salynyp, ákimshilik sharalar qabyldandy.
Ótken jyly «ÁlemStroi-1» JShS, «Saha-2005» JShS merdiger mekemeleri litsenziiasynan aiyryldy. Qurylys-montajdaý jumystaryn sapasyz atqarǵan 36 merdiger mekemege tiisti sharalar kórildi. Odan bólek, qurylys-montajdaý jumystaryn qadaǵalaý barysynda kemshilikterge jol bergen 10 injiniring qyzmetin kórsetetin akkredittelgen tehnikalyq qadaǵalaýshy mekemege shara kórilgen. Sondai-aq 19 tehnikalyq qadaǵalaýshy tulǵanyń sarapshy attestattary 6 aiǵa toqtatyldy. Ákimshilik jaza qoldanylǵannan keiin 1 jyl ishinde qaitalap jasalǵan áreketter – akreditatsiia men litsenziiadan aiyrýǵa alyp keledi.
Oblystyq baqylaý jónindegi basqarmasy tarapynan oblys aýmaǵyndaǵy qurylys nysandarynyń sapasyn baqylaý turaqty túrde júrgiziledi.
