Memleket basshysy Qasym-Jomart Kemeluly Toqaevtyń óńirlerdiń barlyq aýdan, qalalarynda jeke «Otbasyn qoldaý ortalyǵy» KMM-derin ashý týraly tapsyrma bergen bolatyn. Osyǵan orai, Túrkistan oblysyna qarasty barlyq aýdan, qalalarda ómirlik qiyn jaǵdaiǵa ushyraǵan adamdar men otbasylarǵa jan-jaqty qoldaý kórsetetin 17 ortalyq ashyldy. Atalǵan ortalyqtardyń qyzmeti Túrkistan oblysy ákimi Nuralhan Kósherovtiń tóraǵalyǵymen ótken jiynda pysyqtaldy,- dep habarlaidy Dalanews.kz
Jiynda Nuralhan Kósherov jaýapty tulǵalarǵa jumysty jandandyrý boiynsha tapsyrmalar mindettedi.
– Aýdan, qalalardaǵy otbasy qoldaý ortalyqtaryn jeke ǵimaratpen qamtamasyz etip, olardyń materialdyq-tehnikalyq bazalaryn jasaqtańyzdar. Turmystyq aýyr jaǵdaiǵa túsken otbasylarǵa jan-jaqty súiemeldeý kómegin kórsetip, qoǵamǵa tolyqqandy múshesi retinde qaita oralýyn qamtamasyz etý jumystaryn sapaly júrgizýdi tapsyramyn. Mobildi toptardyń jumysyn jandandyryńyzdar, – degen aimaq basshysy tapsyrmalardy tiisti deńgeide oryndamaǵan aýdan, qala ákimderiniń salaǵa jaýapty orynbasarlarynyń tártiptik jaýapkershilikteri qaralatynyn eskertti.
Oblystyq jumyspen qamtý jáne áleýmettik baǵdarlamalar basqarmasy basshysynyń orynbasary Kúmiskúl Mirova Túrkistan oblysyndaǵy Otbasyn qoldaý ortalyqtarynyń qyzmeti týraly esep berdi. Onyń málimdeýinshe, jyl basynan ortalyqtarǵa 4782 ótinish túsip, memlekettik organdardan 426 signal tirkelgen. Ótinishter boiynsha tiisti jumystar júrgizilip, psiholog, zańger jáne áleýmettik qyzmetker tarapynan 4033 túrli qyzmet kórsetilgen.
Oblys ákiminiń tapsyrmasymen birqatar ortalyqta turmystyq zorlyq-zombylyq belgileri bar adamdarǵa bir aiǵa deiingi merzimge ýaqytsha turý múmkindigin beretin jatyn oryndar uiymdastyrylǵan. Degenmen keibir aýdan, qalalarda jatyn oryndar qarastyrylmaǵan.
Biyl ortalyqtardyń jumysyn tsifrlyq platformaǵa aýystyrý boiynsha FSM Social mobildi qosymsha iske qosyldy. Mobildi qosymsha ómirlik qiyn jaǵdaidaǵy adamdarǵa, otbasylarǵa qoldaý kórsetý protsesterin avtomattandyrýǵa baǵyttalǵan. Júie arqyly signal berý jáne tsifrlyq quraldardy qoldaný kómekke muqtaj adamdy erte anyqtaýǵa, oǵan jan-jaqty qoldaý sharalaryn jedel túrde kórsetýge jáne bekitilgen jeke josparlyq is-sharalardyń oryndalýyn qadaǵalaýǵa tolyq múmkindik berdi.
Barlyq aýdan, qalalarda mobildik toptar jumys isteidi. Jumysshy toptardyń quramynda áleýmettik qamsyzdandyrý salasynyń mamandarynan bólek, ishki ister, bilim, densaýlyq saqtaý, qorǵanshylyq qyzmetinen 5 myńǵa jýyq maman bar.
