Túrkistanda etti jáne maily qoi túrleriniń V halyqaralyq kórmesi ótti. «Turkistan show arena» kesheninde ótken kórmege Resei, Qyrǵyzstan, Ózbekstan, Tájikstan, Ingýshitiia, Mońǵoliia, Moldova elderinen mal sharýashylyǵymen ainalysatyn 200-ge jýyq azamat jáne elimizdiń ózge oblystarynan kelgen sharýalar qatysty, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Sharanyń ashylý saltanatyna oblys ákiminiń orynbasary Ertai Altaev qatysyp, kórmeniń mańyzdylyǵyna toqtaldy. Igi isti uiymdastyrýshylar men mal basyn asyldandyrý baǵytynda eńbek etip jatqan sharýalarǵa sáttilik tilep, alǵysyn bildirdi.
– Qoi ósirý qazaq halqynyń ata kásibiniń biri. Mal sharýashylyǵynda jylqy men qoiǵa erekshe mán bergen qazaq halqy qoi jaiýdyń, ony kóbeitý men tuqymyn asyldandyrýdyń ózindik ádis-tásilderin qalyptastyrǵan. Oblysta asyl tuqymdy qoi sanynyń úlesi 13 paiyzdy quraidy nemese 581,4 myń bas. Asyl tuqymdy mártebesi bar 850 birlik agroqurylym jumys isteidi. Sońǵy 10 jylda mal sharýashylyǵy salasynda sanǵa emes sapaǵa mán berile bastady. Mal tuqymyn asyldandyryp, dástúrli sharýashylyqtan zamanaýi mal baǵý tásiline kóshken, qojalyqtardyń tabysy eselenip, áleýeti arta túsýde, – degen oblys ákiminiń orynbasary kórshi memlekettermen ózara yntymaqtastyqty nyǵaityp, jergilikti sharýalar mol tájiribe almasatynyna senim bildirdi. Sondai-aq asyl tuqymdy qoi sharýashylyǵyn odan ári damytý qajettigin atap ótti.
Shara aiasynda etti-maily qoi tuqymynyń «Eń aýyr salmaqty», «Boi biiktigi», «Syrtqy eksterer» atalymdary boiynsha baiqaýlar ótti. Nátijesinde 45 nominatsiianyń jeńimpazdary anyqtalyp, qazylar alqasynyń sheshimimen úzdik qoshqar ielerine mototsikl, teledidar, tońazytqysh jáne kýboktar tabystaldy. Jalpy júlde qory – 30 000 AQSh dollary.
Kórmede Ginnesstiń rekordtar kitabyna engen «Baisary» atty asyl tuqymdy qoi tuqymy alǵash ret kópshilik nazaryna usynyldy. Bul tuqym ettiligimen erekshe. «Baisary» tuqymdy eń úlken qoshqardyń salmaǵy 231 kg tartqan.
Aita keteiik, Túrkistan oblysynyń mal sharýashylyǵy salasy elimizde jetekshi orynda. Respýblikadaǵy iri qara mal sanynyń 12 paiyzy (970,1 myń bas), qoidyń 23 paiyzy (4 135 myń bas), jylqynyń 11 paiyzy (430,7 myń bas), túieniń 15 paiyzy (41 myń bas), óndirilgen ettiń 12 paiyzy (245,8 myń tn), súttiń 13 paiyzy (447 myń tn) óńirdiń úlesinde. Respýblikada eksportqa shyǵarylatyn iri qara mal etiniń 80%, qoi etiniń 75% oblystyń enshisinde.
