Túrkistan oblysynda 50 kolej jumys isteıdi. Onyń 28-i memlekettik bolsa, 22-si – jekemenshik. Óńirdiń ekonomıkasyn damytýda basym baǵytqa ıe aýyl sharýashylyǵy salasy mamandaryn – 10, qyzmet kórsetý jáne týrızm mamandaryn – 3, qurylys salasy mamandaryn 11 kolej daıarlaýda. Sonymen birge medısına, óner jáne gýmanıtarlyq salalar, pedagogıka, tehnıkalyq jáne kópsalaly bilim mekemeleri de bar, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.
Túrkistan oblysy ákimi apparatynyń aptalyq májilisinde kolejderde bilim sapasyn kóterý, tehnıkalyq bazasyn jaqsartý joldary talqylandy. Túrkistan oblysynyń ákimi Darhan Satybaldy Bilim basqarmasy basshylyǵy men jaýapty tulǵalarǵa atalǵan bilim mekemeleriniń jumysyn júıelep, qoǵamǵa qajetti mamandyqtar boıynsha grantty kóbeıtip, memlekettik tapsyrysty ońtaılandyrýdy tapsyrdy.
– Búdjetten kolejderge qyrýar qarjy bólinip otyr. Al bilim sapasy soǵan saı ma? Zerdeleý, monıtorıń jumystaryn jalǵastyryńyzdar. Stýdentteri sabaqqa barmaıtyn, bilim sapasy tómen kolej dırektorlarynyń óz laýazymyna sáıkes nemese sáıkes emesteri boıynsha usynys berińizder. Jumysyn durys atqara almaı júrgenderine zań sheńberinde shara kórilsin. Oqý úrdisin durys úılestire almaıtyndar ornyn bosatýlary qajet. Ekinshiden, jańadan engiziletin mamandyqtar, olardy bilikti ustazdarmen qamtý isine taldaý jasalyp, málimet usynylsyn. Bul máseleni taǵy da qarap shyǵamyz. Jataqhana salý, qural-jabdyqtar boıynsha da tıisti usynystar berilsin, – dedi Darhan Satybaldy.
Túrkistan oblystyq bilim basqarmasy basshysynyń orynbasary Aıgúl Qasymbekovanyń aıtýynsha, óńirdegi kolejderde 75 mamandyq boıynsha 47142 stýdent bilim alýda. Onyń 35 708-i memlekettik tapsyryspen, 11 434-i aqyly negizde bilim alady. Pedagogtar men óndiristik oqytý sheberleriniń sany – 3041, 214 óndiristik oqytý sheberi qyzmet etedi.
Bıylǵy oqý jylyna bólingen 15 525 memlekettik tapsyrys orny tolyq ıgerilip, stýdentter qabyldanǵan. Qazirgi tańda 260 stýdent oqýdan shyǵaryldy. Olardyń arasynda óz ótinishterimen áskerge jáne akademıalyq demalys alǵandary bar. Kolej stýdentteriniń sabaqqa qatysýyna aı saıyn monıtorıń júrgiziledi. Monıtorıńti avtomattandyrý maqsatynda 25 memlekettik kolej bilim alýshylardyń sabaqqa qatysýlaryn qashyqtan qadaǵalaý úshin FACE ID júıesin ornatqan.
Óńirdegi memlekettik 25 kolejdiń 9-ynyń bazasy 2020-2021 jyldary «Jas maman» jobasy aıasanda respýblıkalyq búdjet esebinen 2,5 mlrd. teńgege zamanaýı qural-jabdyqtarmen tolyqqan. 2023 jyly oblystyq búdjetten 18 kolejdiń bazasyn nyǵaıtýǵa 1,8 mlrd. tenge qarajat bólinip, qural-jabdyqtar satyp alyndy. Bıyl 10 kolejge 700 mln. teńge qarjy bólinip, aǵymdaǵy jóndeý jumystary (7 kolej) men jylý júıesin gazǵa aýystyrý (3 kolej) jumystary júrýde. Oblys ákiminiń tapsyrmasymen ońtústik aýdandardaǵy kolejderdi IT salasyna beıimdeý maqsatynda 1 kolejge qajetti qural-jabdyqtar satyp alýǵa 150 mln. teńge bólindi.
Oblystaǵy arnaýly oqý oryndarynda stýdentterdiń teorıalyq bilimin praktıkamen ushtastyrýǵa basymdyq berilýde. Stýdentter veterınarıa, aýyl sharýashylyǵy, kásipkerlik jáne ózge da salalarǵa óndiriske aralasý arqyly beıimdelýde. «Agronomıa» mamandyǵynyń stýdentteri jylyjaıda qıar, qyzanaq, qulpynaı jáne basqa da daqyldardy otyrǵyzý, baptaý, terý jáne tutynýshyǵa ótkizý satysyna deıin úırense, taǵy bir bilim ordasynda stýdentter jibek sharýashylyǵyn damytý úshin tut aǵashtaryn ósirý isin meńgerýde. Balyqty tereń óńdeý, İT salasyn damytý baǵytyn úıretýde de jumystar jandanǵan.
Jyl saıyn 9-11 synypty bitirýshiler sany 77 659-dy qurasa kolejge 12 myńnan astam túlek pen 3000-ǵa jýyq NEET sanatyndaǵy jas qabyldanady. Bıyl «WorldSkills Kazakhstan-2024» chempıonatynda Túrkistan óńiriniń kolej stýdentteri 2 altyn, 1 kúmis, 4 qola, 11 arnaıy medalón jeńip alyp, jalpykomandalyq 6-oryndy (2023 jyly 9-orynda bolǵan) ıelendi.
